Polar Seafood: Rusland niuerfigiinnarsinnaagutsigu taamaaliussaagut

- Rajanik niuffaffissuuvoq.

Polar Seafooodimi siulersuisuni siulittaasoq, Henrik Leth taana naqissusiivoq.

Taamaammat sisamanngornerup unnuaani Ruslandip Ukrainimut saassussinera nunarsuarmiut allat assigalugit malinnaaqqissaarfigaa.

Saassussinerup kingunerisaanik USA-p EU-p Danmarkimiillumi Ruslandimut pilaatitut iliuuseqarnissaat annertussaaq. Polar Seafoodilli Ruslandimut niuernera pisunit eqqugaassanersoq suli oqaatigineqarsinnaanngitsoq, Henrik Lethip KNR-imut oqaatigaa. 

- Rusland matuissappat, rajarpassuit tunisartakkagut allamut tunineqartariaqalissavagut. Taamaaliornernilu tusanit allat akiinut sunniuteqassaaq.

Polar Seafood Ruslandimi fabrikkimi sulisoqarpoq, kisianni kalaallinik danskinilluunniit Ruslandimi sulisoqarani.

Naalakkersuisut Ukrainemut saassussineq ”akuersaarneqarsinnaanngitsutut” oqaatigigaluaraa, suliffeqarfissuup Ruslandimik niueqateqarnini unitsikkusunngilaa.

- Nunanut allanut tunngasunut politikkimut akuliuttussaanngilagut, tamanna allat akisussaaffigaat, Henrik Leth oqarpoq.

- Maleruaqqusat malippagut, pisunullu malinnaalluta. (USA-mit, EU-miillu aaqq.) pillaatitut iliuuserineqartut maannamut inunnit aalajangersimasunik niueqateqarnermut assigisaanullu tunngapput. Uagulli taamaaliunngilagut, Henrik Leth oqarpoq.

Sulisitsisut ilaasortaat millionilikkaanik isertitsisut

Aalisakkat nunatsinneersut ukiuni kingullerni Ruslandimi tunisaalluarput. Pingaartumik 2021-mi covid-19 peqqutigalugu Kinamut niuerneq uningajalluinnarmat, Rusland rajanik nunatsinneersunik pisiortornerulerpoq.

Nunarpummi EU-tulli 2014-mi Ruslandimut niuernikkut mattussinermik killiersuinngilaq. Ruslandimmi qeqertaasa Krim Ukrainimiitoq tiguarmagu mattussineq EU-miit allartinneqarpoq.

- Ruslandimut niuernerput pingaaruteqartorujussuuvoq aamma nunatsinni suliffeqarfinnut allanut pingaaruteqarpoq. Ruslandimut 2014-imi mattusisoqarnerata kingorna rajanik tunisisinnaasutuaavugut, Henrik Leth oqarpoq.

Kinap niuernikkut ammaasseqqinnera pissutigalugu Ruslandimut tunisineq annikilliallaartoq, siulersuisuni siulittaasup paasissutissiissutigaa. Suliffeqarfiulli 2021-mi Ruslandimut niuernermini isertitaasa amerlassusaat Henrik Lethip oqaatigerusunngilai

Sulisitsisullu peqatigiiffiata (GE-p) kisitsisaatai naapertorlugit ilaasortat tamakkerlutik tunisinermi 580 millionit koruuninik isertitsipput. 

Sulisitsisut: Politikkikkut pisussat utaqqimaarpagut

Politikkerit niuernikkut qanorpiaq kinguneqartitsissanersut malinnaaffigissagitsik, Sulisitsisut pisortaat, Christian Kjeldsen KNR-imut oqarpoq.

Nunarpulli aningaasarsiornikkut mattussinernut eqqugaassanngikkaluarpat, suliffeqarfiit allatigut ilungersunartorsiulersinnaapput.

- Pisut assigiinngitsut takorloorneqarsinnaapput. Pilaatitut iliuutsit sukannernerusut pisinnaapput, pisisartut eqqorneqarsinnaapput, imaluunniit pisisartut Ruslandimut tunisassiortunut attuumassuteqarusunnginnertik takutinniarlugu mattussisinnaallutik taamaalillutillu akerleriit arlaat illersornerat ersersillugu.  

- Taamaammat avammut tunisinerup ajornakusoornerulersinnaanera takorloorneqarsinnaavoq.Taamaattoqaraangat nioqqutissat allanut tuniniartariaqalersinnaasarput, tamannalu niuffaffinni allani akinut soorunami sunniuteqartarpoq, Christian Kjeldsen KNR-imut oqarpoq.

KNR-ip Royal Greenland Ruslandimik niueqateqarneq pillugu aamma attaveqarfigaa.

Ingerlatseqatigiiffilli pillaatitut iliuutsinik nalunaaruteqartoqartinnagu oqaaseqarusunngitsoq, Royal Greenlandip attaveqatigiinnermut pisortaa, Masaana Egede, ilisimatitsivoq.