Pituffimmi inuit marluk aapakaat kuppiannik tunillatsissimasut

Aapakaat kuppiannut nunatsinni ersiuteqartoqarpoq. Taakku Pituffimmiipput.

Namminersorlutik Oqartussat tusagassiuutinut taama nalunaaruteqarput.

Tunillatsissimasut taakku marluk Pituffimmi mattusimagallarneqarput. Taakkua peqqissillutik tunillaasinnaajunnaarnissaasa tungaanut mattusimaneqarallassapput.

Paassissutissat maannamut pigineqartut tunngavigalugit taakku tunillassimasinnaasaminnik qanigisaqanngillat.

Nunatsinni Nakorsaaneqarffimmit naliliineq naapertorlugu nunatsinni sumiiffinnut allanut tuniluussinnaanera navianaateqanngilaq.

Tunillatsissimasoq nunatsinnut tikeqqammerpoq, tikinnerminilu ersiuteqanngilaq.

Nappaammut ersiuteqaleraangat aatsaat nappaat tuniluutilersarpoq.

Nappaat aapakaat kuppiisa tappiorannartuannik virusumik patsiseqarpoq. Qanimut attuumanermi nappaat inuit akornanni tuniluukkajuppoq.

Amermi pullartat imaannik attuinikkut imaluunniit anersaartuutit aqqutigalugit tuniluukkajuppoq, taamatuttaaq ataasiakkaani tunillannartulitsigut ilaatigut oqorutitigut ilaalu ilanngullugit tunillatsittoqarsimanera nassuiarneqarluni.

AAMMA ATUARUK SSI: Arlallit abekoppemik toqquteqarnissaat naatsorsuutigineqarsinnaavoq

Nappaat namminerisaminik qaangiuttarpoq nalinginnasumillu sapaatit akunneri marluk sisamallu akornanni sivisussuseqartarluni.

WHO-p nunarsuarmi peruluutaalersutut taallugu avammut juulip naanerani nalunaarutigaa. Nappaalli nunatsinni ernumassutigineqartorujussuanngitsoq, nunatsinni nakorsaaneqarfimmi nakorsaq Paneeraq Noahsen KNR-imut juulip ulluisa 26-anni oqarpoq.

- Abekopperneq uloriananngilaq aammalu tuniluutiasuunngilaq, tunillanneqarsimasut amerlanerit napparsimaveqarfimmit ikiorneqanngikkaluarlutik namminneq anigortarpaat, inuup nammineq akiuussutissaata akiorsinnaavaa, taamaattumik ernumassutissaanngilaq, Paneeraq Noahsen taamani oqarpoq.