Nakorsaaneqarfik Abekopperneq pillugu: Ernumanngilagut
Nappaat abekopperneq nunat tamalaat peqqissutsimut suleqatigiiffissuata WHO-p nunarsuarmi peruluutaalersutut taallugu avammut nalunaarutigimmagu maanna maluginiarneqartorujussuanngorpoq, taakkumi taama nalunaarnerat aarlerinartoqarneranik kalerriineruvoq.
Mannali tikillugu nunani assigiinngitsuni 71-sini inuit 14.000-t tamatuminnga tunillanneqarsimapput, WHO-lu naapertorlugu inuit tallimat tamatuminnga toqquteqarsimallutik.
Nappaatip nunatsinni tuniluuteratarsinnaanera pillugu ernumassutissaanngitsoq, nakorsaaneq Paneeraq Noahsen oqarpoq.
Abekoppernerup nunarsuarmi peruluutaalernera WHO-p sapaatiummat nalunaarutigaa.
- Tamanna pivoq, nunat arlallit abekoppemik napparsimasoqarneranik nalunaarmata.
- Nunani assigiinngitsuni 71-ini inuit 14.000-t tunillanneqarsimasut nalunaarsorneqarput.
- Nunatsinni suli abekoppertoqarneranik nalunaaruteqartoqanngilaq.
- Abekopperneq ukiuni arlalippassuarni Afrikami ilisimaneqarpoq, Europamili qaqutiguinnaq nalaanneqartarsimavoq.
- Abekopperneq uloriananngilaq aammalu tuniluutiasuunngilaq, tunillanneqarsimasut amerlanerit napparsimaveqarfimmit ikiorneqanngikkaluarlutik namminneq anigortarpaat, inuup nammineq akiuussutissaata akiorsinnaavaa, taamaattumik ernumassutissaanngilaq, Paneeraq Noahsen oqarpoq.
WHO-mili immikkut ilisimasallit akerleriissutigaat nunarsuaq tamakkerlugu nappaatip tamatuma tunillaassornera qanoq nalilersorneqassanersoq. Nunarsuarmilu tamatuminnga toqquteqartut arlaqaraluartut nakorsaaneqarfik eqqissisaavoq:
- Ikittuinnaat toqussutigaat, taakkulu allanik nappaateqarsimasooreersimassapput, amerlanerpaalli tamatuminnga atugallit qaangertarpaat, Paneeraq Noahsen oqarpoq.
Abekoppimik tunillanneqarsimagaanni kuppeerarnermut assingusunik kuppinik anillattoqartarpoq, qiiarululluni uulinneq atugaasarpoq, kissarneqarneq niaqorlunneq aammalu nukinnik anniaateqarneq. Inuk taamatut virusilik qanillilluinnarsimagaanni atoqatigiinnikkulluunniit tunillaasoqarsinnaavoq, nappaalli qaangerneqarsinnaasoq erseqqissaatigineqarpoq:
- Eqqiluisaarneq atoqatigiinnermilu usuup puuata atornissaa pingaaruteqarput, virusimillu tunillanneqarsimasorigaanni imminut mattunnissaq pingaaruteqarpoq, soorlu coronartilluni mattuttoqartarneratut, Paneeraq Noahsen oqarpoq.
Coronalli tuniluutereernerata kingorna nunatsinni peqqinnissaqarfik nappaatinut tuniluuteratarsinnaasunut upalungaarsimanissamut misilittagaqalereerpoq.
- Nappaatit allat pinaveersaartinneqartarnerattuulli tuniluuttoqannginnissaa sulissutigineqassaaq. Napparsimavimmulli unittorpassuaqarnissaa naatsorsuutiginngilarput, virusimi taanna tuniluutiasuunngilaq, aammalu ulorianartuunngilaq nammineerlunilu qaangerneqarsinnaavoq, Paneeraq Noahsen oqarpoq.
