Tusagassiorfik: Pituffik Space Base milliardit nalingannut nutarsarneqassaaq

Pituffik Space Base milliardit nalingannut nutarsarneqartussanngorpoq.

Danmarkimi aviisi Politiken, tusagassiortumik sakkutooqarfimmut tikeraartitsisimasoq, taamak allappoq.

Pituffik Space Basemi qullersap Jason Terryp Politikenimut oqarnera naapertorlugu Pituffik Space Base ukiuni tuliuttuni aqqaneq-marlunni nutarsarneqassaaq.

Aningaasat qasserpiaat atorneqassanersut oqaatiginngilaa, oqarlunili assersuutigalugu attaveqaatitigut nutaanik atortoqalissallutik, kiisalu radarit Wi-Fi-ilu ilaatigut nurtarsarneqassasut.

Tamatumunnga ilutigitillugu sulisut nutaanik barakkitaassapput, massakkut atorneqartut aserfallassimammata. 

Sakkutooqarfik massakkut arfineq marlunnik hangareqarpoq, marluinnaalli timmisartunut atorneqartarput aserfallassimaneri pissutigalugit. Sinneri toqqorsivittut atorneqarput. Hangarit pingasut-sisamat aamma nutarsarneqassapput timmisartunut atorneqarsinnaalerseqqillugit, ilaatigut timmisartunit sorsuutinit nutaanit F-35-init atorneqarsinnaalersillugit.

Sakkutooqarfimmi nukissiorfik aamma nutarterneqassaaq patajaannerusumik innaallagissamik pilersuisoqarsinnaalersillugu. 

USA-p aviisimut Berlingskemut siorna uppernarsarpaa Avannaani sakkutooqarfitoqqamik nutarsaanissamut milliardtit atorneqassasut.

Inatsisartuni Nunanut Allanut Isumannaallisaanermullu Ataatsimiititaliap nalunaarummik tamatuminnga ilisimasaqanngitsoq, taamani siulittaasumit Pipaluk Lyngemit (IA) Berlingskemut siorna oqaatigineqarpoq