Amerikamiut Pituffimmi sakkutooqarfimmut aningaasaliiniartut
Amerikamiut Pituffimmi sakkutooqarfimmi aningaasaliiniarput.
Tamanna amerikami nakkutilliinermik oqartussaasuisa nalunaarusiaanni atuaruminaallisakkami ilaatigut atuarneqarsinnaasoq, aviisi Berlingske allappoq.
Aningaasat milliardit dollarsit nalinginut issittumi, ilaatigut Pituffimmi sakkutooqarfimmut atorneqassasut, nalunaarusiap ilaani allassimavoq.
Amerikamiut, Pituffimmi nutarterisoqalersoq, aviisimut Berlingskemut uppernarsarpaat.
Sakkutooqarfiup atortui nutaanngiliartorput, nutarterisoqarnissaalu USA-p soqutigisarigaa, amerikami sakkutuut timmisartortartui taama oqaaseqarput, oqaaseqaat taanna aviisip Berlingskip amerikamiut aallartitaqafiannit pissarsiarisimavaa.
Amerikamiut aallartitaqarfiat tamanna pillugu annerusumik oqaaseqarusunngilaq.
Nunarput ilisimasaqanngitsoq
Pituffimmi sakkutooqarfimmi suut USA-mit nutarterniarneqarnersut, Kalaallit Nunaanni Naalakersuisunit Folketingimiillu ilisimaneqanngillat.
Pipaluk Lynge Rasmussen Inatsisartuni nunanut allanut Sillimaniarnermullu Ataatsimititaliami siullittaasuuvoq naalakkersuisuutitaqartunilu IA-mi ilaasortaalluni.
AAMMA ATUARUK Múte B. Egede: Pituffimmi isumaqatigiissut nunatta tigussagaa naatsorsuutigaara
Taassuma amerikamiut Pituffimmi sakkutooqarfianni nutarterisoqarnissaanik tusagaqarsimani aviisimut Berlngskemut oqarpoq.
- Peqataatinneqarata oqaluuserineqarusunngilagut. Uagut pineqartilluta peqataassaagut. Uagununa nunarput arlaannik pisoqaraangat nalunngittariaqarparput, Pipaluk Lynge Rasmussen oqarpoq.
Nunarput Danmarkilu ilisimatinneqassasut
Pituffimmi sakkutooqarfiup nutarterneqarnissaa Folketingimi Kalaallit Nunaat pillugu ataatsimiititaliap aamma Illersornissamut ataatsimiititaliap oqaluuserinikuunngilaat.
Inuit Ataqatigiinneersup folketingimut ilaasortap Aaja Chemnitz Larsenip aviisimut Berlingskemut tamanna oqaatigaa.Taassuma erseqqissaagaa, Kalaallit Nunaanni Naalakkersuisut tamanna pillugu ilisimatinneqarnissaat pingaaruteqartoq.
USA-p Kalaallit Nunaata Danmarkillu isumaqatigiissutaat naapertorlugu, Kalaallit Nunaanni sakkutooqarnikkut annertuumik allannguisoqassagaangat USA danskit kalallillu naalakkersuisuinik oqaloqateqartarlunilu paasissutissiisartussaavoq.
Allannguisoqassagaangalli USA-p Kalaallit Nunaat Danmarkilu apereqqaartassanngilai.
/ritzau/
