Pituffik pillugu akissutigineqartut IA-p Siumullu tusaatissatut tiguaat
KØBENHAVN: Pituffimmi sullissisussarsiorneq oqallisaaqisoq pillugu Kalaallit Nunaat pillugu ataatsimiititaliami matoqqasumik paasissutissiisoqareersoq, danskit nunanut allanut tunngasunut ministeriata nalunaarutigaa, sulissutigineqartoq isumaqatigiissummi piffissaliunneqarsimasup appartinneqarnissaa, Exelis Servicep oktobarip aallaqqaataani ukioq manna sulilernissaa eqqarsaatigalugu.
Aamma atuaruk Exelisip kiffartuussinissamik isumaqatigiissutaata sivikillisarneqarnissaa Lidegaardip sulissutigaa
Suliariumannittussarsiuussinissaq nutaaq aningaasatigullu Kalaallit Nunaannut pilerinarnerusoq ataatsimiititaliat marluk sulissutigaat.
Doris Jakobsenip Siumumeersup oqariartuutigineqartut naatsorsumisaarpai:
- Soorunami oqarsinnaanngilanga naammagisimaarlugu, soorunali neriuutigaara nunanut allanut tunngasunut ministerip Martin Lidegaardip oqarneratut - sivikillineqarsinnaasoq.
Inuit Ataqatigiinneersup Johan Lund Olsenip tamanna ingasattumik tupaallaatiginngilaa:
Nunanut allanut tunngasunut ministerip ilisimatitsinera naammagisimaarpiuk?
- Hmm, naammagisimaaringa? Affaata missaani naammagisimaarpara. Siunissami ingerlaqqinnissaq pillugu nunanut allanut tunngasunut ministeri maanna oqarpoq, amerikamiut Kalaallit Nunaat peqatigalugu suli isumaqatiginiarneqartut. Isumaqatigiinniarnerilli qanoq inerneqassanersut kialuunniit ilisimanngilaa, KNR-imut taama oqarpoq nangillunilu:
- Kingumulli isigisumik suli aaqqitassaqarpoq, tassalu suliffeqarfiit pillugit inatsisit.
Aamma atuaruk Pituffik pillugu ataatsimiinnermi Nunatta peqataatinneqannginnera isorineqartoq
IA nunanut allanut tunngasunut ministerimut arlalinnik apeqquteqaateqarpoq, ilaatigut ingerlatseqatigiiffiup Danmarkimiittuuneranik qanoq ilinerani naliliisoqarsinnaanersoq apeqqutigalugu. Folketingimi amerlanerussuteqartut januaarip qaammataani akersissutigaat, danskit naalakkersuisuisa sulissutigissagaat Pituffimmi sakkutooqarfimmi kiffartuussinermik danskit/kalaallit suliffeqarfii isumaginnittuussasut.
USA inissisimalluarpoq
Johan Lund Olsenili isumaqarpoq Exelis Services A/S-imut siumaqatigiissutaasup sivikillineqarnissaata isumaqatigiinniutigineqarnissaa ajornakusuussasoq.
- Isumaqarpunga ajornakusuussasoq, 2013-imilimi kukkusoqarpoq, amerikamiut sullissisussatut toqqarneqarmata. Aalajangiusimasariaqarparpulli - soorlu aallaqqaataaniilli oqaatigisaringa - Illuatungaani Danmark Kalaallit Nunaallu illugiillutik USA-mut niueqatigiinnissamik isumaqatigiissuteqarput. Tassani illersornissamut isumaqatigiissut 1951-imeersoq pineqarpoq, tassanilu sullissisussaq tassaassaaq danskit-kalaallillu suliffeqarfiutaat, Johan Lund Olsen naggasiivoq.
