Pituffik pillugu ataatsimiinnermi Nunatta peqataatinneqannginnera isorineqartoq
KØBENHAVN: Taamatut pineqarnerput assut pakatsissutigaara.
Johan Lund Olsen, maannakkorpiaq Washingtonimiittoq, KNR-imut taama oqarpoq. Nammineq Doris Jakobsenillu Pituffik pillugu Nunanut allanut tunngasunut ministereqarfimmi ippassaq marlunngornermi ataatsimiinnissamut qaaqquneqarsimannginnertik isornartorsiorpaa. Folketingimi Kalaallit Nunaannut tunngasunut oqaaseqartartut allat ataatsimiinnermut peqataapput.
- Nunanut allanut tunngasunut ministerip Pituffik Pituffimmilu kiffartuussinissamik isumaqatigiissut pillugu ataatsimiinnissamut, Folketingimi ilungersuutigisimasannut, qaaqqusinera tatigeqatigiinnermut siuarsaataavallaanngilaq. Kalaallit Nunaata apeqqutini taama ittuni peqataatinneqarnissaa pissusissamisooraluarpoq, Johan Lund Olsen KNR-imut taama oqarpoq.
AAMMA ATUARUK Johan Lund Olsenip Pituffik pillugu ataatsimeeqataaqqusaannginnini uumitsaatigigaa
Ataatsimiinneq ilisimatitsissuteqarfiusoq
Ataatsimiittoqarnissaa Siumumi IA-milu ilisimaneqaraluarpoq, pisortatigoortumilli ataatsimiigiaqqusissummik tunineqarsimanngillat. Tamannalu pingaartumik Enhedslistenip Kalaallit Nunaannut tunngasunut oqaaseqartartuanit Finn Sørensenimit isornartorsiorneqarpoq.
- Ilisimatinneqarsimannginnerat ajuusaarnartupilussuuvoq. Tamanna nunanut allanut tunngasunut ministerimut ataatsimiinnerup aallartinnginnerani aamma erseqqissaatigaara. Kisianni oqaatigissavara ataatsimiinneq angusaqarfiuvallaanngimmat. Aalajangiisoqaranilu sumulluunniit piginnaatitsissummik tunniussisoqanngilaq, Finn Sørensen oqarpoq.
Ataatsimiinnermili suut oqaluuserineqarsimanersut taassuma danskillu partiivisa Kalaallit Nunaannut tunngasunut oqaaseqartartuisa allat oqaatigiumanngilaat - taamaallaat ataatsimiinneq 'ilisimatitsinissamik siunertaqartoq' aammalu nunanut allanut tunngasunut ministerimit 'nutaarsiassartaqannginnera' oqaatigaat.
Allattaa qaaqquneqarsimavoq
Nunanut allanut tunngasunut ministeri Martin Lidegaard isornartorsiuineq tunngavissaqannginnerarlugu KNR-imut e-mailerluni allappoq.
“Isornartorsiuisoqarnera ajuusaarutigaara, unneqqarillungalu nassuerutigissavara paasiuminaatsikkakku. Johan Lund Olsen maanna Washingtonimiittoq ataatsimiinneq sioqqullugu attaveqarfigaara. Aamma allattaata ataatsimiinnermi peqataasinnaanera neqeroorutigaara,” taama allappoq nangillunilu:
“Kalaallit danskillu ataatsimoornissaannut tapersiinissaat qulakkeerniarlugu partiit oqaaseqartartui ataatsimiigiaqquneqarput. Ataasiinnaq anguniagaraara, tassalu Kalaallit Nunaata Danmarkillu suliami matumani ataatsimoortariaqarnerat.”
Taamatulli nassuiaateqarnera Johan Lund Olsenip akueriumanngilaa.
- Sulisorisamma qaaqquneqarsimanerinut tunngatillugu, ataatsimiinneq sioqqullugu ataatsimiinnermut takkunnissaminnut minutsinik sisamaannarnik periarfissinneqarput. Taamaaliorsinnaanngillat. Tamanna naammaginanngilluinnarpoq. Nunanut allanut tunngasunut ministerimut siunnersuutigigaluarpara ataatsimiinneq aqaguanut kinguarteqqullugu, ulloq taanna Københavnimiissagama. Tamannali nunanut allanut tunngasunut ministerip soqutigisimanngilaa, tamannalu assut pakatsinarpoq, Johan Lund Olsen oqarpoq.
Doris Jakobsenip Siumumeersup Johan Lund Olsenip matoqqasumik ataatsimiittoqarsimaneranik isornartorsiuinera ilalerpaa. Taamatullu pisoqaqqinnginnissaa neriuutigaa, danskilli naalakkersuisuisa nunatsinnilu naalakkersuisut Pituffik pillugu suliami ataatsimoornerat tapersersorini erseqqissaatigalugu.
