SIK: Pisortat suliffeqarfiutaanni sulisut salliunneqarlik
Pisortat suliffeqarfiutaanni sulisunut aningaasarsiat pillugit isumaqatiginninniarnerit Jess G. Berthelsenip naammagisimaanngilluinnarpai.
- Arlalinnik peqquteqarpunga, tassa ilaatigut maannakkut pisortanut isumaqatiginninniarnermi koruuniunngitsumilluunniit ilaasortatsinnut neqerooruteqarput. Sulisartunut maani nunami napatitsisunut akissaqannginnerarput illuatungaatigut aningaasaliipput 3 milliardinik mittarfiliortitsinissamut.
AAMMA ATUARUK SIK-p akissarsiat 92 øremik qaffanneqarnissaannut neqeroorut kamaatigigaa
Kalaallit Airportsimi siulersuisuni siulittaasup Johannus Egholm Larsenip aningaasarsiai 500.000 koruuninit 750.000 koruuninit qaffanneqarneri sapaatip akunnerata siuliani oqallisigineqalerneranit SIK-p siulittaasuanut qisuariartitsivoq.
- Pisortat ullumikkut oqariartuutigaat akissaqaratik taannalu uagut paasiuminaatsipparput illuatungaatigut aningaasaliisinnaagunik mittarfinnut 4 milliardingajannik aammalu pisortat suliffeqarfiutaasa iluaniittunut siulersuisut aningaasarsiaat taamatut qaffaavigisinnaagunikkit isumaqarpunga akissaqarsinnaasariaqartut sulisartut aningaasarsiaasa qaffaavigineqarnissaannut, Jess G. Berthelsen oqarpoq.
Aningaasarsiat pillugit isumaqatiginninniarnerit qaqugu piariissanersut Jess G. Berthelsenip oqaatigisinnaannginnerarpaa.
