Pinngitsaaliissummik unitsitsinerit Doris Jakobsenip misissortinniarpai
Tassa pinngitsaaliissummik unitsitsinerit siorna 50-iusut Nunatta nakorsaaneranit misissortinneqarnissaat Doris Jakobsenip kissaatigisimavaa:
- Pinngitsaaliilluni unitsitsisarnerit amerlassusiat pillugu ernumasoqarnera saqqummiunneqarpoq, tamannalu qisuariarfigaara. Taamaattumillu Nunatsinni Nakorsaaneq, sammisamut tamatumunnga nakkutilliisuusoq, qinnuigivara suliat 50-it 2015-imeersut misissorneqarnissaannik aallartitsissasoq, Doris Jakobsen, tusagassiuutinut nalunaarummi taama ilaatigut allaaserisaqarpoq.
Tarnikkut katsorsaanerup misissuivigineqarnissaanut Inatsisartut Ilaqutariinnermut Peqqissutsimullu Ataatsimiititaliaanni siulittaasup siulittaasullu tulliata kissaataat naalakkersuisup taamaasilluni qisuariaateqarfigaa.
Aamma atuaruk Peqqissutsimut Qullersaqarfik: Tarnimikkut nappaatillit sullinneqarnerat ajalusuunngilaq
Ukiuni kingullerni marlunni unitsitsisarnerit misissorneqassapput, soorlu Peqqissutsimut Qullersaqarfiup pisortaata Jóanis Erik Køtlumip oqaatigereeraa pinngitsaaliissummik unitsitsinerit 2014-ip siorna nalunaarsorneqarnerat amigaateqartut Peqqissutsimut naalakkersuisup tikkuartorpaa, taamaammallu kisitsisitigut annertunerusumik ukiunut arlaqartunut kingumut sanilliussinissamut periarfisaasimanngitsoq oqaatigalugu.
Aamma atuaruk Tarnikkut katsorsaanermi pissutsit ataatsimiititaliap misissortikkusukkai
Annertuumik misissuisoqarnissaa Ilaqutariinnermut Peqqissutsimullu Ataatsimiititaliap kissaatigippagu taava kommunit ilanngunneqarnissaat piumasaqaataasoq Doris Jakobsenip oqaatigaa, kommuninik suleqateqarnissaq pingaartuunerarlugu, taakkuummatami inunnut tarnimikkut napparsimasunut neqerooruteqarnissaat.
