Peqqissutsimut Qullersaqarfik: Tarnimikkut nappaatillit sullinneqarnerat ajalusuunngilaq
Tarnimikkut nappaatillit sullinneqarnerat ajalusuunngitsoq, Peqqissutsimut Qullersaqarfiup pisortaata Jóanis Erik Køtlumip Sermitsiamut allagaqaateqarnermini erseqqissaatigaa.
Tarnimikkut nappaatilinnik sullissineq ajalusuunngilaq, akerlianilli pisoqarluni, Køtlum oqarpoq.
Aamma atuaruk Tarnikkut katsorsaanermi pissutsit ataatsimiititaliap misissortikkusukkai
Tarnimikkut nappaatilinnut immikkoortortaqarfimmi pissutsit piffissami kingullermi ajalusoornerarneqarput, tarnimikkut nappaatillit sullinneqarnerisa ajalusoorsimanerat tarnip nappaataannut nakorsat marluk Sermitsiamut oqaatigaat tarnimikkut nappaatillit sullinneqarnerat ajalusoorsimasoq, pinngitsaaliissummik unitsitsisarnerit siorna 2015-imi 50-iusimammata 2010-mi pingasuinnaasut oqaatigalugu.
Tarnimikkulli nappaatillit sullinneqarnerat ajalusoornani akerlianik pisoqartoq Peqqissutsimut Aqutsisoqarfiup pisortaata oqaatigaa. Katsorsartinnissamut utaqqisarnerup sivikillisimanera taassuma ilaatigut tikkuartorpaa, imminullu toqussinnaasut katsorsaanikkut nakorsiartitsisarnikkullu ukkatarineqarnerisa annertusarneqarsimanerat aamma tikkuartorlugu.
Pinngitsaaliissummilli unitsitsinerit amerliartungaatsiarsimanerat Jóanis Erik Køtlumip nassuerutigaa. Unitsitsinernulli atatillugu nalunaarsuinerit 2014-ip siuliani amigaateqarsimanerat aamma erseqqissaatigaa, taamaanneratalu kingunerisaanik naatsorsueqqissaarnermut atatillugu kisitsisinik allanik assersuussassaqannginnera tikkuartorlugu.