Kalistat Lund: Piniariartarfiit kangerluillu takornariartaatinut matussapput
Takornariartaatip Ocean Explorerip Alpefjordenimi ulluni pingasuni sapaatit akunneranni kingullermi ikkarleqqanerata kingorna, sinersorluni takornariartitsisarneq siunissami killilersuiffigineqarnerusariaqartoq nunatsinni politikerit arlallit anguniarniarlugu oqaatigaat.
Ikkarlinnerup naggataa ajunngikkaluartoq, pisoq allatut ilungersunarnerujussuarmillu kinguneqarsimasinnaagaluartoq, Kalistat Lund (IA), avatangiisinut naalakkersuisoq, isumaqarpoq.
- Ajutuuittoqarsimasuuppat, umiarsuaq putusimasuuppat kivippalluunniit taava annaassiniarnerup tungaatigut ajornartorujussuarmik inissisimalertussaasimagaluarpugut, oqarpoq.
Taamaattumik takornariartaatit siunissami nakkutigineqarnerulernissaannik politikereqatimi oqarnerat isumaqatigalugu iluarsiisoqarnissaanik neriorsuivoq.
Naalakkersiusoqatai Vivian Motzfeldt (S) aamma Karl Tobiassen (S) takornariartaatit sumi angalasinnaanerat inatsisiliuunneqartariaqartoq aamma oqaaatigereerpaat. Taama oqarnerat Kalistat Lundip ilalerpaa:
- Assersuutigalugu Avanersuarmi Qaanaami, Ittoqqortoormiini Tasiilallu eqqaani kangerlunni piniariartarfinni uumasoqafissuarni angallattut qularnanngilaq aannertunerusumik killilersuiffigineqatussapput aamma nalilersorneqartussaapput, oqarpoq.
Maleruaqqusat aappaagu piariissasut
Philip Max Cossen, umiarsuarmi naalagaq imarsiornermillu ilinniarfimmi imarsiornermut inatsisinik ilinniartitsisartoq, SIMACimi Danmarkimi Svendborgemiittumi, Ocean Explorerip ikkarlinnera tusaramiuk tupaallappallaanngilaq.
- Ilimanarsinnaanikuugamimi, Kalaallit Nunaata imartaani takornariartaatit angalasut amerlerujussuarnikuummata, oqarpoq.
Taamaakkaluartoq inatsisinik sukaterisoqarsimanngilaq, aatsaallu Ocean Explorer ikkarlimmat susoqarnialerluni.
Kalistat Lundip ilanngullugu erseqqissaatigaa, maleruaqqusat nutaat aamma sukaterinissat suliniutigalugit qangali aallartinneqareersut.
- Una suli pinngikkallarmallu naalakkersuisoqatigiinni attuumassuteqartut naalakkersuisut pingasuulluta una sammillugu aallartereernikuuarput aamma kommuninut kattuffinnut tusarniaanissat siunnerfigineqareernikuupput. Unalu pisimasoq massakkut annikillisitsinngilat tamakkut tungaasinut sulinarnissatsinnut.
Taamaammat aamma nalunaarusiassap suliarinissaa tuaviuuttariaqarpoq, isummersorpoq.
- Qularnanngitsumik ukiup tulliani takornariarnerujussuup takkutinnginnerani qularnanngilaq periutsimik nutaamik takussutissaqalereersimassasugut.
Suliarli tassunga unissanngitsoq, Kalistat Lund oqaluttuarpoq.
- Pinngortitamut uumasunut inuussutissarsiutitsinnullu assigiinngitsunut akornutaasunut, killiliinissaq imaassinnaavoq eqqartorneqarnerusariaqartoq.
Nunalerinermut, imminut pilersornermut, nukissiuutinut avatangiisinullu naalakkersuisoqarfik Kalistat Lund (IA) siuttoralugu maanna oqartussaasunik naalakkersuisoqarfinnillu ilaaffigineqartumik isumannaallisaarnermik qaffassaaffiusinnaasunik suliniutaasinnaasunillu malittarisassaasinnaasunillu naliliinissamut aggersaasoqassaaq.
- Maannakkut pisimasoq eqqarsaatigalugu nalilersuinissat piareersarneqarput, allaffissornikkut sulinerat ullulersinnanngilara sumut killissimanersut, Kalistat Lund naggasiivoq.
