Nunatsinni politiit Ocean Explorerimut tungatillugu suliartik naammassivaat
Kalaallit Nunaata Politiivisa Tunumi kangerluit ilaanni Alpefjordenimi ikkarlisimagaluartoq kaanngareermat takornariartaammut atatillugu suliatik naammassivaat.
Politiit tusagassiorfinnut taama nalunaarput.
Takornariartaat 206-inik issimasulik kangerlummi ulluni pingasuni kaanngarsinnaanani uninngareerluni sisamanngormat kaanngartinneqarpoq.
Politiit, Imarsiornermik Qullersaqarfik, Sirius-Patrulje, Issittumi Sakkutooqarfik aamma sakkutuut sinerissamik nakkutilliissutaanni Knud Rasmussenimi inuttat peqatigalugit ikkarlinnermut tunngasunik misissueqatigaat.
- Ikkarlinnermut atatillugu inatsisinik unioqqutitsisoqarsimanersoq kingorna misissorluarneqartussaasoq, politiit allapput.
Ocean Explorer Alpefjordenimik qimatsisinnaalerpoq. Imarsiornermut Qullersaqarfiup takornariartaat peqquaa umiarsualivississasoq umiarsuup naqqa aqqartartunit misissorneqarsinnaaniassammat.
Umiarsuaq Islandip tungaanukassagunavippoq.
