Naalakkersuisoq: Takornariartaassuarnut inatsisit malittarisassallu sukannernerulertariaqarput
Takornariartaassuit nunatta imartaani angallassisarnerannut inatsisit malittarisassallu sukannernerulertariaqartut, naalakkersuisoq Siumumeersoq Vivian Motzfeldt, isumaqarpoq.
Aviisi Sermitsiaq.AG taama allappoq.
Nunanut allanut, inuussutissarsiornermut niuernermullu naalakkersuisoq, Vivian Motzfeldt, takornariaqarnermut tunngasuni aamma akisussaasuuvoq.
Umiarsuaq takornariartaat "Ocean Explorer" Ittoqqortoormiit avannaata kangerluisa ilaanni Alpefjordimi ataasinngornermi ikkarlinnerata kingorna, taanna takornariartaassuarnut inatsisinik malittarisassanillu sukannernerulersitsisoqartariaqarneraavoq.
- Ukioq manna umiarsuit takornariartaatit pilersaarutitik malillugit nunatsinnukarrattarput. Takornariartaassuit tamakku nunatta sineriaani aammalu kangerlunni angalasartut tamarmik akuersissummik qinnuteqaateqarnikuullutillu pissarsinikuupput.
- Pisorli maanna nalaanneqartoq immini ersersitsivoq, aappagumiit inatsisitigut malittarisassatigullu sukatikkanik, ersarissunik avaqqutaarneqarsinnaanngitsunillu malittarisassaqartittariaqarigut, Vivian Motzfeldt Sermitsiaq.AG-mut oqarpoq.
Kommunit tusarniarniaraat
Nunatta sineriaa 44.000 kilometeritut isorartutigaaq. Tamatuma ilarujussua nunatta kommuniisa iluanniippoq.
Taamaammat nunatta kommunii tallimat takornariartaassuit nunatta sineriaani angallassisarnerannut inatsisilioqataaqqunartut, naalakkersuisoq isumaqarpoq.
- Kommunit nalunngilaat kangerluit piniariartarfiit aalisarfiillu immikkut paarilluagassat nalinginnaannarlu angallaffiusariaqanngitsut sumiippiarnersut, Naalakkersuisunullu pingaaruteqarpoq sulinerup ingerlanerani kommunit tusaassallugit, naatsorsuutigaaralu aappagu inatsisit malitassallu umiarsuit takornariartaatit nunatta imartaani aammalu kangerlummukartariaqaavikkunik kangerlunni sorlernukarsinnaassanersut inatsisitigut malittarisassatigullu piareersitsisinnaassalluta, Vivian Motzfeldt Sermitsiaq.AG-mut oqarpoq.
Umiarsuup takornariartaatip ikkarlinnerata avatangiisit mingutsinneqarnerannik inunnillu ajoqusertoqarneranik kinguneqannginnera nuannaarutigigini, Vivian Motzfeldtip oqaatigaa.
Inatsisitigut malittarisassat qulaajarneqarlutillu sukatersinnaaffiisigut sukaterneqartariaqartut, naalakkersuisup aamma erseqqissaatigaa. Kujataani qeqertaq eqqissisimatitaq, Uunartoq, tamatumani assersuutigaa.
Eqqissisimatitaanerali nunap qaaniinnaq atuuppoq. Taamaammat umiarsuit takornariartaassuit qanorluunniit angitigisut Uunartup eqqannguani angallassinnaapput.
Ullumikkummi inatsisit malittarisassallu naapertorlugit imartatsinni angalaarsinnaanermut akuersissummik pissarsisimaneq naammattoq, Vivian Motzfeldt oqarpoq.
- Suli Naalakkersuisuni isummerfissaqaraluarluta, uanga nammineq isertuutissanngilara, sumiiffiit eqqissisimatitat imartaat aamma ilanngullugit eqqissisimatinneqartariaqartut isumaqarama, taamaammat taanna aamma qaqilissallutigu pissusissamisoorpoq.
Umiarsuaq takornariartaat ikkarleqqasoq, "Ocean Explorer", 206-inik issimasoqarpoq.
Umiarsuullu taassuma Pinngortitaleriffiullu umiarsuaanik kalillugu pingasunngornermi ullaakkut kaanngartinniaraluarnera iluatsinngitsoq, Issittumi Sakkutooqarfik Facebookimi pingasunngornermi ilisimatitsivoq.
Knud Rasmussenimit orninneqartoq
Issittumi Sakkutooqarfik umiarsuarmik ikkarlittoqarneranik ataasinngornermi ualikkut nalunaarfigineqarami, umiarsuaa alapernaarsuut “Knud Rasmussen” ikkarlittumut qaninnerpaavoq.
Tassa "Knud Rasmussen" ulloq taanna 1200 sømilit missaannik, tassa 2200 kilometerit missaannik ungasitsigisumiippoq.
Taamaammat umiarsuarmut takornariartaassuarmut aatsaat tallimanngornermi ullaakkut apuutissangatillugu nalunaarput.
Aatsaalli tallimanngornermi unnukkut apuutissangatilersimagitsik, Issittumi Sakkutooqarfimmiit tamatuma kingorna nalunaarput.
