Pinerluttut atugaat ajuipput

Nuummi pineqaatissinneqarsimasunut inissiivimmi atugassarititaasut pillugit Europarådep inuit naalliutsinneqartarnerisa akiorniarneqarnissaannut suliniaqatigiiffianit Danmarkip inatsisinik atuutsitsinermut ministeria isornartorsiorneqarpoq.
Allattoq Jette Andersen, Knud Reimer
januaarip 23-at 2013 12:38

Europaråde-p inuit naalliutsinneqartarnerinut akiuiniarnermut suliniaqatigiiffiannit Nuummi pineqaatissinneqarsimasunut inissiivinniittunut atugassarititaasut iluarseqqullugit Morten Bødskov piumaffigineqarpoq.

Morten Bødskov-ilumi pinaasinngilaq, Nuummilu parnaarussivissap sanaartorniarneqalernera nittarsaallugu.

- Nuummi parnaarussivissap paamaarunneqarneranik isornartorsiutigineqartut ilisimareerpakka. Parnaarussivissalli piviusunngortinneqarnissaa maanna sulissutigileruttorparput, ukioq 2017-imilu naammassereersimanissaa naatsorsuutigalutigu, Morten Bødskov oqarpoq.

Nuummi pineqaatissinneqarsimasunut inissiiviup naliginnaasumik isornartoqartinneqarnerata saniatigut arnap pineqaatissinneqarsimasup angutit akornanniitinneqarsimanera, 17-nillu ukiullip allanut attaveerutsinneqarlunilusooq parnaarunneqarsimanera isornartorsikkanut ilaapput.

Aamma pineqaatissinneqarsimasut tarnimikkut katsorsagaasarnissaannutik pisariaqartitsineq, kiisalu ikiaroornartumik imigassamillu atuinerlunnermit katsorsaagaasinnaanermut neqeroorutissat isornartorsiuinermi amigaatigineqartunut ilaapput.

Morten Bødskov-illi tamanna akissutissaqartippaa, Danmarkimilu naalakkersuisut, Enhedslisten, Liberal Alliance aamma De Konservative-t nunatsinni Pinerluuteqarsimasunut Isumaginnittoqarfiup 14 millionit koruuninik immikkut aningaasaliiffigineqarnissaa isumaqatigiissutigisimagaat Inatsisinik atuutsitsinermut ministerimit nittarsaanneqarluni.

Nuummi parnaarussivissaq timmisartoqarfiup aqqutaani sanaartorneqartussaq 8.000 kvadratmeterinik angissuseqassaaq, parnaarussanullu assigiinngitsunut 76-inut inissaqassasoq oqaatigineqarluni.

Parnaarussivissamiittussat sulisinnaassapput, pulaarneqarsinnaassallutik, sunngiffimmilu sammisassaqartinneqassallutik. Tamatuma saniatigut parnaarussivimmi allaffeqarfeqassaaq, atortorissaarutinullu immikkoortortaqarfissap saniatigut isumannaallisaanermut atortorissaarutit assigiinngitsut aamma pigineqassallutik.

Parnaarussivissaq ungaloqassaaq, sakkortuumillu pinerluuteqarsimasunut immikkoortortaqarfiup immikkut iikkamik ungaloqarnissaa pilersaarutaalluni. Parnaarussivissaq katillugit 347 millionit koruuninik akeqassangatinneqarpoq.

Aamma atuaruk