Pinerluttuliortarneq annikilliartorpoq – ikiaroornartulli pillugit inatsisinik unioqqutitsinerit ukiuni 20-ni aatsaat taama amerlatigisut
Nutaarsiassanik ullut tamaasa atuagaqartaruit tusarnaagaqartaruilluunniit immaqa upperinavianngilat.
Kisianni piviusumik siorna pinerluttuliornerit 2021-mit annikinnerupput.
Kalaallit Nunaanni Politiit ukiumoortumik kisitsisit saqqummiunneqaqqammersut tamanna takutippaat.
Tamannalu nutaarsiassatsialaasoq, politiit pisortaat, Bjørn Tegner Bay naliliivoq. Unnerluutiginninnerit ukiut aappassaanik ikinnerupput.
- Ilorraap tungaanut ingerlasoqarnera soorunami nuannaarutigissavarput, taamalu ingerlaannartoqarnissaa neriuutigiinnassavara, taanna oqarpoq.
- Eqqaamaannassavarpulli ikilinerat kisitsisinik qaffasingaatsiartunik, inuiaqatigiinni ilungersunartumik ajornartorsiutaangaatsiartunik tunuliaqutaqartunik, iliuuseqarfigineqartussanik ersersitsimmata.
Nakuusertoqannginnerusoq
Pingaartumik inunnut navianartumik pinerluuteqarnerit ikilisimapput. Nakuusertoqarneranik unnerluutiginninnerit 2021-mut sanilliullugit 19 procentimik ikilipput.
2022-mi nakuusertoqarneranik nalunaarutiginninnerit 1.090-iupput, taakkulu ukiup siuliani 1.348-ullutik.
Soorunami nutaarsiassatsialaavoq – kisianni ukiumoortumik kisitsisit naapertorlugit nakuusertoqarsimanera pillugu suliat 2021-mi 2020-milu aatsaat taama amerlatigipput.
Naalli nakuusertoqarneranik nalunaarutiginninnerit ikiligaluartut taakku Danmarkimi Savalimmiunilu agguaqatigiissillugu amerlassusiannit sisamariaataat sinnerlugit suli amerlanerupput.
130 kiilu hashi arsaarinnissutigineqartoq
Taarsiulluguli ikiaroornartoq pillugu inatsisinik unioqqutitsinerit siorna amerleriangaatsiarput.
Politiit ikiaroornartoq pillugu unioqqutitsinernut atatillugu 584-inik siorna nalunaarsuipput – hashilu 129,68 kiilu arsaarinnissutigineqarluni.
Unnerluutiginninnermi kisitsisini ukiuni 20-ni aatsaat taama qaffasitsigisut, Kalaallit Nunaanni Politiit nalunaarutigaat. KNR-ip allaasereriigaatut nunatsinnut ikiaroornartumik anngiortumik eqqussuinermi tigusarineqartut ukiup siulianut sanilliullugit pingasoriaammik amerlanerupput. Taakkulu hashimik anngiortumik annermik eqqusseriarnerullutik.
Ikiaroornartumik anngiortumik siorna eqqusseriarnerit angutit pingasut inuunerannik naleqarput.
Kalaallit Nunaanni Politiit kinguaassiutitigut naapertuilluanngitsuliornerit ukiuni arlalinni annertuumik aamma ukkataraat.
Kisitsisit taakkunani allanngorpallaanngilaq – meeqqanulli kinguaassiutitigut naapertuilluanngitsuliornerit annikitsumik amerleriarlutik.
- Kisitsilli 0-imiitsikkusunnerugaluarpara, piviusorli ajoraluartumik taamaanngilaq. Meeqqanulli naapertuilluanngitsuliornerit amerlanerulernatik unnerluutiginnittartut amerlanerulersoraagut, Bjørn Tegner Bay oqarpoq.
- Suleqatigisartakkagullu ukiuni kingullerni nukippassuit atorlugit meeqqat inersimasullu naapertuilluanngitsuliornernik unnerluutiginnittarnissaannik qanorlu iliortoqarsinnaanerannik paasissutissiiffigaagut. Tassanngalu amerlanerusut naapertuilluanngitsuliorfiginninneq pillugu politiinut unnerluutiginnittarnerat pitsaavoq, politiit pisortaat oqarpoq.
