Unnerluutigineqartut eqqartuussinermi akeqqeersimaarpasillutik pinngitsuunerartut
Siumumi politikeriusimasup, Lars-Emil Johansenip aamma kommunimi pisortaanerusimasup, Lars Møller Sørensenip unnerluutigineqarneranni eqqartuussivimmi suliaq akunnerni sisamani kinguartinneqareerluni aallartippoq.
Angutit marluk katillugit 730.000 koruuninik piffissami 2019-imi novembarimit 2021-mi aggustimut peqquserluuteqarsimasutut unnerluutigineqarput, taakkuli eqqartuussivimmi unnerluutigineqartunut tamanut pinngitsuunerarput, unnerluussisussaatitaasullu angutit pinerluuteqaqqikkunik tamarmik immikkut ukiumi ataatsimi pineqaatissinneqarsimasunut inissiisarfimmiittussanngortinneqassasut piumasaraat.
Akeqqersimaarpasittut
Unnerluutigineqartullu marluk eqqartuussivimmi nassuiaateqarneranni illersuisup unnerluussisussaatitaasullu akornanni akeqqersimaartoqarpoq. Lars Møller-Sørensen siulliulluni nassuiaateqarpoq, taassuma nassuiaateqarnera katillugu akunnerit marluk sinnerlugit sivisussuseqarpoq, eqqartuussivimmilu illuatungeriit akornanni arlaleriarluni unitsitsisoqarlunilu angutit marluk eqqartuussissuserisuinit akerliliisoqartarpoq.
Lars Møller-Sørensenilli nassuiaateqarnermini Lars-Emil Johansenimut atassuteqarnani oqaatigaa, Lars-Emil Johansenili kommunimi pingaartumik Kofoed Skolep Tasiilami innuttaasunut atugarliortunut ikiuisartup pilersinneqarneranut atatillugu avataanit siunnersortitut atorfinitsinneqarsimanerarpaa.
- Lars-Emil Johansenillu toqqarnissaa kajuminnartuusoq, Lars Møller-Sørensen eqqartuussivimmi oqarpoq, tamannalu politikeriusimasup ilaatigut politikkikkut attuumaffippassuaqarneranut atassuteqarluarneranillu pissuteqarnerarlugu.
- Kisianni kina attaveqartuunersoq eqqaamanngilara, Lars Møller-Sørensen oqarpoq.
Akissarsiat taamaammat qaffanneqartut
Siunnersortimullu isumaqatigiissut naapertorlugu Lars-Emil Johansen suliniummi tassami qaammammut akunnerit 20-t atorneqarsinnaassaaq, unnerluussissullu naapertorlugu qaammammut aningaasarsiat 25.000 koruuniupput. Qaammammulli aningaasarsianik 2020-mi septembarimi 40.000 koruuninut qaffappaat.
Lars Møller-Sørensenip oqarnera naapertorlugu suliassat annertunerungaatsiarnerannik taamaammallu sivisuneruneranik tamanna pissuteqarpoq. Lars-Emil Johansenilu nassuiaateqalerami aamma taama nassuiaavoq.
- Piffissaq sivisunerungaatsiartoq tassunga atorpara, tamannalu pillugu akilerneqassallunga, taanna oqarpoq.
‘Isumassarsiaq sumeernersoq naluara’
Unnerluutigineqartut marluk ullumikkut ikinngutigiillutik, kisianni Kommuneqarfik Sermersuumi aatsaat siunnersortinngorami imminnut ilinnialersimallutik Lars-Emilip eqqartuussivimmi nassuiaatigaa.
- Siunnersortitullu suliaqarnermi Tasiilami Kofoeds Skolemik pilersitsinissaq pingaarnertut suliassaavoq, taanna oqarpoq.
Suliaqarsimanngitsutut unnerluutigineqarputit, kisianni suliaqarsimanak isumaqarpit, taassuma illersuisua aperivoq.
- Isumassarsiaq taanna suminngaanneernersoq paasisinnaanngilara, kommunimi pisortaq taama isumaqatigiissusiorsinnaasoq inatsisit malillugit isumaqatigiissuteqarfigaara. Pasilliutigineqartorlu ilisarisinnaanagu. Eqqungajanngilarluunniit, Lars-Emil Johansen nassuiaateqarfimmit naggasiilluni oqarpoq.
Eqqartuussivimmi suliaq ilisimannittunit arlalinnik nassuiaateqartoqarnerani aqagu marlunngornermi nangeqqinneqassaaq. Borgmesteriusimasoq aamma aningaasaqarnermut naalakkersuisuusimasoq ilaatigut nassuiaateqassapput. Ilisimannittut katillugit qulit missaanniittut suliami aqagu nassuiaateqassapput, sapaatip akunneratalu naanerani eqqartuussuteqartoqarnissaa naatsorsuutigineqarpoq.
