Naalakkersuisut siulittaasorisimasaat kommunimilu pisortaanerusimasoq eqqartuussivimmi unnerluutigineqassasut
Naalakkersuisut siulittaasorisimasaat, Lars-Emil Johansen aamma kommunimi pisortaanerusimasoq, Lars Møller-Sørensen peqquserluuteqarsimasutut eqqartuussivimmi suliami sapaatip akunnerata tulliani ataasinngornermi aallartittumi unnerluutigineqassapput.
Taakku ataatsimoorlutik Lars-Emil Johansenimut siunnersortitut suliaqarnermut suliarisimanngisaannarsimasaanut atatillugu 730.000 koruuninik akiliuteqarsimasutut unnerluutigineqarput.
Akissarsiat qaffakkiartortut
Unnerluussissut KNR-ip pissarsiarisimasaa naapertorlugu Lars-Emil Johansen Kommuneqarfik Sermersuumi 2019-imi novembarimi 25.000 koruuninik qaammammut akissarsialerlugu atorfinitsinneqarpoq.
Unnerluussissulli naapertorlugu akissarsiaritinneqartut tapilerneqarnera pissutigalugu 2020-mi septembarip aallaqqaataani 40.000 koruuninut qaffanneqarput.
Taamaalilluni Lars-Emil Johansen Lars Møller-Sørensenimit ikiorneqarluni pissarsiassarinngisaminik siunnersortitut 730.000 koruuninik akissarsitinneqarpoq.
Eqqartuussut pineqaatissiinngikkallartoq
Kommunimi pisortaanerusimasoq, Lars Møller-Sørensen peqquserlunnerup saniatigut kommunimi pisortaanertut atorfimminik atornerluisimasutut aamma unnerluutigineqarpoq, naalakkersuisullu siulittaasorisimasaat 'pisortani atorfimmik atornerluinermut' peqataasimasutut unnerluutigineqartoq unnerluussummi allassimavoq.
Eqqartuussivimmi suliaq Eqqartuussisoqarfik Sermersuumi sapaatip akunnerata tulliani ataasinngornermit pingasunngornermut suliarineqassaaq, unnerluussisussaatitaasullu angutit marluk utaqqisitamik ukiumi ataatsimi inissiisarfimmiiittussanngortitsinissamik eqqartuunneqassasut 730.000 koruuninillu taarsiissuteqarnissaat piumasaraat.
