Ilanngutassiortoq KNR-imut: Trumpip Kalaallit Nunaat allanngortillugu oqaluttuariniarpaa
Donald Trump Junior nuannaarluni kiinneraarlunilu Nuummut aqqusaarpoq.
Trump Jr.-ili maanna angerlaqqereerami Danmarkimut saassussivoq.
Taanna amerikamiut tusagassiorfiatigut Fox Newsikkut Danmark naqisimannittutut kalaallinullu ammip qalipaataanik immikkoortitsisutut oqaatigaa.
- Inuusuttorpassuit ornilluta Danmarkimukaraangamik pitsaannginnerusutut pissusilersorfigineqartarlutik oqaatigaat. Taakku angerlaqqinnissaminnik oqarfigineqartarlutik oqaatigaat. Ammip qalipaataanik immikkoortitsisoqangaatsiarpoq, taanna Fox Newsimut oqarpoq.
Trump Jr.-ip nalunaarutaa Kalaallit Nunaata Danmarkillu akornanni pissutsinut innarliiniarneruvoq.
DR-ip nunani tamalaani ilanngutassiortua, Steffen Kretz USA-mi siusinnerusukkut najugaqarsimasoq USA-milu danskit tusagassiorfianut ilanngutassiortuusimasoq oqarpoq.
- Donald Juniorip tikeraarnera USA-mut uteruni oqaluttuarisinnaasaminik avammut paasititsiniaaniarneruvoq pilersaarluarneqarsimasoq. Kalaallit Nunaata Donald Trump isumaqatigaat kalaallillu USA-mut ilanngunnissaminnik allamik annerusumik kissaateqanngitsut, taanna KNR-imut oqarpoq.
Nutaarsiassat ilumuunngitsut USA-mi ingerlaartut
Donald Trump Junior kalaallit Trumpimik nuannarinnilluarnerannik Fox Newsikkut taamaallaat oqaluttualiunngilaq.
Taannami angalaqatigisaalu sivikitsumik tikeraarnerminnit videolianik arlalinnik saqqummersitsipput. Videot tamarmik kalaallit USA-mik nuannaartorinninnerannik uppernarsaapput.
Nunatsinnili amerlanerpaat piviusoq assigiinngisitaarnerusoq ilisimaneqarpoq, Steffen Kretzillu oqarnera naapertorlugu USA-mi taamaattoqanngilaq, nutaarsiassammi piviusorsiortut amerlanngillat.
- Amerikamiut eqqunngitsunik paasissutissarsiffigineqaannavipput. Inuiaqatigiinni oqaloqatigiinneqanngilaq. Suna eqqortuunersoq eqqunngitsuunersorlu pillugu ataatsimut isumaqatigiissutigineqartarunnaarnikuuvoq. Trumpip politikkikkut malinnaasuni oqaluttuamik nammineq tunniussiffigai.
Trumpip iliuusai pimoorunneqassasut
Steffen Kretz DR-imit ilanngutassiortutut Donald Trumpip præsidentiunerani siullermi ukiuni sisamani sulivoq. Taassumalu tusagassiorfiit aallaqqaammut kukkussuteqarlutik Trumpip oqaaserisai piumasaarsormata pimoorutinngilaat.
Steffen Kretzili Donald Trumpip oqaaserisai pimoorunneqartariaqartut piffissap takutinnikuugaa isumaqarpoq.
- Qanoq oqarnera tusarnaarneqassaq, taama iliornissani kissaatigigaa naatsorsuutigineqassaaq. Piviusunngortissanerai qulakeersimanngilaq, kisianni Kalaallit Nunaat perusullugu pissaanermillu atuerusulluni oqaruni taama taama isumaqarsimassaaq. Tamanna qularutiginngilluinnarpara, Steffen Kretz oqarpoq.
Panamap ikerasaata Kalaallit Nunaatalu aqunniarnissaannut pinngitsaaliilluni sakkutuulersornissaq imaluunniit aningaasaqarnikkut pillaanermik iliuuseqarniannginneranik qulakkeerisinnaanersoq, Donald Trump Floridami Mar-a-Lagomi tusagassiortunik katersortitsinermi aperineqarpoq. Præsidentinngortussaq tassunga apeqqummut ima akivoq:
- Naagga, tamatuminnga qulakkeerinnissinnaanngilanga. Aningaasaqarnikkut isumannaatsumik ingerlanissaq eqqarsaatigalugu pisariaqartippavut. Iliuuseqartariaqarunarpugut.
USA-p illersornissaanut Kalaallit Nunaat pingaaruteqartoq, Trump oqarpoq.
- Nunarsuaq tamakkerlugu illersornissaq eqqarsaatigalugu Kalaallit Nunaat pisariaqartipparput. Tamanna ukiorpaalunni ilisimareerpara.
