Danskit partiivisa siulittaasuisa ataatsimiinneq assigiinngitsumik misigisimaffigaat
Donald Trumpip Kalaallit Nunaannik aqutsinissaminik qulakkeerinissamut sakkutuunik imaluunniit aningaasaqarnermik atuinissaminik naaggaarsinnaanani marlunngornermi tusagassiortunik katersortitsinermi oqaaseqarnerata kingunerisaanik danskit partiianni siulittaasut tamarmik ministereqarfimmi unnummut ataatsimiipput.
Ataatsimiinneq nalunaaqutaq 16.30 aallartippoq, partiillu siulittaasuisa ataatsimiinnginnerminni nalunaarutigisaat assigiinngitsut danskit tusagassiorfiini arlalinni atuarneqarsinnaapput.
SF-ip siulittaasuata, Pia Olsen Dyhrip pissutsit "ilungersunartutut" ataatsimiinnginneq sioqqutilaarlugu oqaatigai.
- Tamanna ilungersunarluinnartuusoraara. Sillimaniarnermut politikkimi qaffasingaatsiartumut tunngavoq, taanna Ritzau-imut oqarpoq, Pelle Dragstedilu Enhedslinstenimeersup TV2 naapertorlugu naalakkersuisut nalorninartorsiorsimanerarpai.
Danmarksdemokraternenit Inger Støjberg allaanerusumik oqaaseqarpoq, taassuma Donald Trumpip decembarip 22-annili Kalaallit Nunaannik oqartussaaffeqalernissamik isumassarsiamik oqaaseqartaleqqinneranit danskit naalakkersuisut sulerisimanersut eqqarsarnartoqartippaa:
- Decembarip 22-annit maannamut ilisimagaanni tamanna uissuummissutissaavallarsinnaanngilaq, taanna ataatsimiinnissaq sioqqullugu TV2-mut oqarpoq.
‘Naalagaaffinngornissaq piviusorsiunngitsoq’
Politikeri alla talerperlerneersup, Liberal Alliancep siulittaasuata, Alex Vanopslaghip danskit naalakkersuisuisa nalunaaruteqarnernut qisuariarnerat taperserpaa, taassuma Trumpip oqaaserisai tamarmik ilungersuunneqartariaqanngissorai.
Dansk Folkepartip Morten Messerschmidtip Kalaallit Nunaata naalagaaffinngornissaa piviusorsiornerunngissoraa. Kalaallit naalagaaffeqatigiinnit anigaluarunilluunniit "USA-mit tiguneqaannassagunarput".
- Danskit naalakkersuisuisa kalaallit naalakkersuisuinut isumaaqqusinissaannut, piviusumillu oqaatiginninnissaannut amerikamiunillu oqaloqatiginnilernissamut maanna tunngassuteqarpoq, taanna Ritzau-imut oqarpoq.
Oqaloqatigiilluarpugut
Partiit akunnerit marluk qaangiummat – nalunaaqutaq 18.15 anillaqqimmata qisuariaatit assigiinngillat.
- Oqaloqatigiilluarpugut, ataatsimut isiginninnissaq pingaaruteqarpoq, suleqatigiilluarnerpullu eqqaamassavarput, Aki-Matilda Høegh-Dam ataatsimiinnerup kingorna oqarpoq.
Inger Støjberg Danmarksdemokratineersoq allaanerusumik oqaaseqaqqippoq, taassumalu akunnerit marluk missaannik sivisussuseqartumik ataatsimiinnerup kingorna danskit naalakkersuisuinit ersarissumik pilersaaruteqartoqarnissaa suli ujartoraa.
- Maanna susoqarnissaanut pilersaaruteqartoqanngitsoq inerniliissutigisinnaagunarpara.Neriuppunga naalakkersuisut Trumpimut atatillugu suliniuteqarnerussasut, Danmarksdemokratineersoq oqartoq TV2 allappoq.
Ataatsimiinnermi suut oqaatigineqarsimanersut partiit siulittaasuinit oqaatigineqarsinnaanngilaq, ataatsimiinnermi eqqartorneqartut oqaatigineqarsinnaanngillat.
Ataatsimiinnerulli kingunitsianngua ministeriuneq, Mette Frederiksen (S), Troels Lund Poulsen (V) aamma Lars Løkke Rasmussen tusagassiortunik katersortitsipput, taakku Danmarkip suleqatigisaani USA pingaarnerpaasoq erseqqissaatigeqqippaat.
