USA-mi ullut aqqaneq-marluk qaangiuppata præsidentinngortussaq, Donald Trump, Kalaallit Nunaannik aqutsilerusulluni pinngitsaaliiniarnermini sakkutuulersornissaq aningaasarsiornerluunniit atorsinnaanerlugit naaggaarusunngilaq.

Tamanna taassuma Floridami Mar-a-Lagomi tusagassiortunik katersortitsinermi oqaatigaa.

Tamanna naalakkersuisut siulittaasuata, Múte B. Egedep maanna qisuariarfigaa.

- Oqariartuutigineqartut ippassaq soorunami aarleriummernarput. Taamaattorli uiveqataannginnissarput uivinnginnissarpullu inuiattut pisariaqarpoq, Múte B. Egede KNR-imut oqarpoq.

Donald Trump ulluni kingullerni ullormut ilaatigut arlaleriarluni nammineq inoqatinut attaveqaatini atorlugit nunarput pillugu saqqummiussaqartarpoq.

Kisianni nunatsinnik aqutsilerusulluni pinngitsaaliilluni sakkutuulersornissaq aningaasarsiornerluunniit atorsinnaallugit ippassaq aatsaat oqaatigaa. Tassalu Kalaallit Nunaat pillugu saqqummiussaqartarneri sakkukilliartunngillat.

- Naagga, tamatuminnga qulakkeerisinnaanngilanga. Aningaasaqarnikkut isumannaatsumik ingerlanissaq eqqarsaatigalugu pisariaqartippavut. Iliuuseqartariaqarunarpugut, Trump Kalaallit Nunaannut Panamakanalimullu tunngatillugu sakkutuulersornermik atuinianersoq toqqaannartumik aperineqarami akivoq.

Ataatsimoornissaq toqqammagissagipput

Tamanna Kalaallit Nunaanni innuttaasut arlallit ernummatigigaat oqallittarfinni assigiinngitsuni tusarsaavoq. Taakkualu ernumanerat Múte B. Egedep paasilluarpaa.

-  Paasilluarsinnaavakka nunatsinni ernumasut amerlammata. Aammalu oqaatsit taama anninneqartut imaannaanngissinnaasut soorunami eqqarsalersitsisut inuttaasunit paasilluarpakka. Taamaammallu ataatsimoornissaq isumaqarpunga toqqammavigisariaqaripput. Nukipput tassaniippoq, taanna oqarpoq.

Donald Trumpip oqaasii, USA-p nunatut, nunat allat peqatigalugit, Issittumi pisussaaffeqaqataaneranut tulluartuunngitsut, Naalakkersuisut siulittaasuat, Múte B. Egede isumaqarpoq.

-  Issittup sakkulersorfiunnginnissaanut USA-p nammineerluni aamma pisussaaffileeqataanikuunera Issittumi nunat assigiinngitsut isumaqatigiissuteqarnitta aallaavigisaanik eqqaamassavarput.

Præsidentitut ivertinneqartussap ernerata, Donald Trump Jr.-ip tikeraarnera Donald Trumpip nunatsinni piginnittoorusunneranut attuumassuteqarnersoq amerlasuut isumaliutersuutigaat.

Donald Trump Jr-illi takornariatuinnaq marlunngornermi tikissimalluni aamma poltiikkikkut tunngasunik nammineq oqaaseqartussaanani erseqqissaatigaa. Donald Trump Jr.-ilu akunnerni tallimat affaanillu tikeraarnera qaangiuteqqipallappoq.