Angutip toqutsisimasutut eqqartuunneqarsimasup suliassanngortitseqqinnini taamaatiinnaraa

2023-mi februaarip aallartinnerani toqutsisoqarnera pillugu suliap suliassanngorteqqinneqarnerata suliarineqarnerani ulloq siullermi marlunngornermi pisussaagaluarpoq, eqqartuussivimmilu suliaq suliassanngorteqqinneqarsimasutulli allatulli aallartikkaluarpoq.

Angulli 35-nik ukiulik nassuiaateqartussanngormat eqqartuussissuserisuata, Finn Meinelip illersukkami eqqartuussiveqarfimmit eqqartuussut akueriniaraa taamaammallu suliassanngortitseqqiineq taamaatikkaa oqaatigaa.

- Illersugara suliassaqarami uangalu pinerluuteqarsimasunut tarnip nappaataanut nakorsamut nutaamik isumaqatigiissuteqartoqarnissaa neriuutigigakku illersukkama eqqartuussiveqarfimmit eqqartuussut akueraa, Finn Meinel oqarpoq.

Eqqartuussummi akuersineq angutip nassuerutiginninneranik isumaqanngitsoq, unnerluussisussaatitaasoq, Alexander Stürup oqarpoq.

- Nassuiaammik nutaamik tusagaqanngilagut, taamaammat eqqartuussiveqarfimmi pinngitsuunerarluni nassuiaateqarnera pigaarput.

- Kisianni eqqaamasaqarsinnaanngikkuni, kisianni teknikkikkut uppernarsaatissaatit akiorsinnaanagit takusinnaaguniuk taava suliap tamarmi uteqqinneqarnissaa isumassaqanngilaq, Alexander Stürup oqarpoq.

Finn Meinelillu illersukkami pinerluuteqarsimasunut tarnip pissusianut nakorsamik nutaamik oqaloqateqarsinnaanissaa, taassumalu paarinnittoqarnissamik innersuussiunnaarnissaa neriuutigaa.

Unnerluussisussaatitaasup piumasaqaat attatiinnaraa

Alexander Stürupilli paarinninneq suli eqqortuusoraa.

- Toqutsereernikuusimagaanni maannalu toqutsisimasutut aamma eqqartuunneqarsimagaanni taama paarinnittoqarnissaanik piumasaqaat eqqartuuvoq, taanna oqarpoq.

- Kisianni ilassutitut nalunaarut allaanerulluinnassappat taava piumasaqaatip taamaaginnarnissaa neriorsuutigisinnaassanngilara, taanna oqarpoq.

Angutip pinerluuteqareernikuusimanera eqqarsaatigigaanni oqaloqatigiinnerup nutaap kingorna inerniliissut allaanerulissappat unnerluussisussaatitaasup tamanna uissuummissutigissavaa.

Angutip pinerluuteqarsimasunut tarnip pissusianik nakorsamik qaqugu oqaloqateqaqqissinnaanissaa suli ilisimaneqanngilaq, nunatsinnulli januaarip naanerani tikittoqassaaq, eqqartuussivimmilu eqqartuussissuserisup unnerluussisussaatitaasullu tarnip nappaataanik nakorsap angummik oqaloqateqarnissani piffissaqarfigissagaa neriuutigaat.

Angut pinerluuteqarsimasunut tarnip nappaataanut nakorsamik oqaloqateqareerpat Nunatta Eqqartuussisuuneqarfiata suliaq tulliani aalajangiiffigissavaa, tassanilu angut qanoq pineqaatissinneqassanersoq taamaallaat aalajangiiffigineqassalluni.