Kommune Kujalleq akileraartarnermut suliami millionilikkaanik akiligassinneqartoq

Kommune Kujalliup aningaasaatiminik tukattorujussuarmik ingerlatsisimanera pillugu, eqqartuussivimmi uissuumminartumik marlunngornermi ullaap tungaani aalajangiisoqarpoq. 

Kommune akileraarutinut piffissaq eqqorlugu 2023-mi februaarimit 2024-mut akiliuteqarsimanngilaq. Aningaasat katillugit 400 millionit koruunit sinnerlugit amerlassuseqarput.

Eqqartuussivimmi suliap sapaatip akunnerata siuliani suliarineqarnerani tamanna illersuisup, Charlotte Pedersenip isumaqatigaa.

Akileraartarnermullu aqutsisoqarfiup Kommune Kujalleq 6.103.593 millionit koruuninik piffissaq eqqorlugu akilerneqarsimanngitsunik akiliisariaqarsoraa.

Immikkoortoq tamanna kommunip akuerinngilaa.

Kommune Kujalleq akileraarutinut akiligassanik amigaataasunik akileraartarnermut aqutsisoqarfimmut katillugit 4 millionit koruunik akiliissasoq naalagaaffiup karsia eqqartuussinermi aningaasartuutinut akiliissasoq maanna aalajangerneqarpoq.

Unnerluussisussaatitaasut akileraartarnermut aqutsisoqarfik sinnerlugu eqqartuussivimmi suliaqartut taamaalillutik tamakkiisumik pissarsinngillat, taakku isumaat naapertorlugu pisussaagaluarlugit. 

Akileraartarnermut aqutsisoqarfimmit qisuariaateqartoqanngitsoq

Eqqartuussivimmi suliarineqarnerani Kommune Kujalliup iliuusai mianersuaalliornerujussuartut taaneqarsinnaanersut qitiuvoq.

Illersuisulli taamaattoqanngissoraa. Akileraartarnermut Aqutsisoqarfiup Kommune Kujalleq attaveqarfigisimanngilaa, kommunillu akileraarutinut akiitsoqarnini nammineerluni oqaatigaa.

- Akileraartarnermut aqutsisoqarfimmit qisuariaateqartoqanngilaq. Kommunillu unneqqarilluni aningaasanik akiitsoqarneranit tamanna aatsaat tusarneqarpoq, illersuisoq eqqartuussivimmi sapaatip akunnerata siuliani oqarpoq.

Unnerluussisussaatitaasup kommunip aningaasaqarnera ‘aaqqissuussaanngitsorujussuusoraa’. Kommunimi aqutsisut akileraarutit eqqortut nalunaarutigaat, akiliuteqarnatilli, tamannalu mianersuaalliornertut taaneqarsinnaavoq. 

- Ukiuni arlalinni kukkuluttortoqarsimavoq, maannalu akisussaaffiginianngilaat, taanna eqqartuussivimmi oqarpoq.

Kommunimit aningaasaqarnikkut ilungersuasumit oqaaseqartoqanngitsoq

KNR-ip Kommune Kujallermi borgmesteri, Malene Vahl Rasmussen (D) apersornissaanut periarfissamut atatillugu oqaloqatigaa, taannali piffissami matumani oqaaseqarumanngilaq.

Borgmesterip eqqartuussut qanoq isumaqarfigineraa aamma kommunip aningaasaqarnera ullumikkut qanoq innersoq KNR-ip apeqqutigerusukkaluarpaa.

Malene Vahl Rasmussenip aningaaqarnerup aqussinnaalernissaa pingaarnerpaatinniarlugu borgmesteritutut siorna atuutilernermini oqaatigaa.

- Kommunerput qaqeqqissappat ingerlaqqissappallu aningaasanik nutaanik pilersitsinissarput qulakkeertariaqarparput. Aningaasat nutaat isumaqarpoq sulisut akileraartartut amerlisariaqarput. Taamaammat inuussutissarsiornikkut inerisaanissaq pingaartorujussuuvoq, borgmesteri taamani oqarpoq.

Kommune Kujallermi aningaasaqarnermut maanna pisortaq, Arne Andersen sapaatip akunnerata siuliani eqqartuussinermi ilisimannittutut nassuiaateqartunut ilaavoq. Taanna akileraarutinut akiliutit amigaataasut paasineqarnerata kingorna atorfinitsinneqarpoq, taamaakkaluartorli kommunip maannakkut aningaasaqarnera pillugu aamma aperineqarpoq.

- Kommune aningaasaqarnikkut suli ilungersuavoq. Ilaat akileraarutinut amigaataasuneerput, akiitsunillu ukuninnga akiliisinnaaniarluta aningaaserivimmut atorniartariaqarpugut, aningaasaqarnermut pisortaq eqqartuussivimmi oqarpoq.