Suliaq uissuumminartoq Kommune Kujalliup aningaasaqarniarneranut tunngasoq eqqartuussivimmi marlunngornermi suliarineqarpoq

Kommune Kujalleq Kalallit Nunaata Eqqartuussivianit marlunngornermi eqqartuunneqarmat, aningaasarpassuit pineqarput. 

Kommunip akileraarutit A-skat aamma sulinermi akitsuut katillugit 400 million koruunit sinnerlugit, Akileraartarnermut Aqutsisoqarfimmut piffissaq eqqorlugu februaarimit 2023-mit maajimut 2024-mut akiliutigisimanngilai.

Tamanna Kommune Kujalliup eqqartuussivimmi marlunngornermi isumaqatigigaa, illersuisuata Charlotte Pedersenip oqaatigaa.

Unnerluussisussaatitaasulli kommuni akiligassiissummik 6.103.593 koruuninik akiliissasoq piumasaqaatigaat, tassa akiitsup 1,5 procentianik amerlassusilinnik piumasaqartoqarpoq.

Tamanna kommunip akueriumanngikkaa illersuisoq eqqartuussissuserisoq oqarpoq.

Kommune Kujalliup Akileraartarnermut Aqutsisoqarfimmut 40 millionit koruunit taarsigassarigai siornatigut saqqummiunneqarpoq. Unnerluussisussaatitaasulli eqqartuussivimmi oqaluttuaraa, kommuniip akileraarutinit akiligassat 406 milliuunit koruunit ukiup ataatsip ingerlanerani piffissaq eqqorlugu akilertarsimanngikkai. Qaammatillu ilaanni akilinngilluinnartarsimavoq.

Ulloq eqqartuussiffik sivisuvoq, akilinngitsoorsimanerlu kommunemit paasineqarmat, kommunep nammineerluni Akileraartarnermut Aqutsisoqarfik attavigisimagaa illersuisup ilaatigut erseqqissaatigaa.

Unnerluussisussaatitaasulli Kristian Buskov Nierhoffip kommunimi aningaasaqarnikkut pissutsit ajornerat eqqaavaa.

Eqqartuussut sapaatip-akunnerata tulliani marlunngornermi oqaatigineqassaaq.

Naatsorsuutinik kukkunersiuisup avataaneersup ajornartorsiutit saqqummiukkai 

Kommune Kujallermi aningaasaqarnikkut ajornartorsiutit avataanit sullissisoqarneratigut aatsaat paasineqartut eqqartuussivimmi marlunngornermi paasinarsivoq.

Suliffeqarfik siunnersuisartoq avataaneersoq kommunimi piginnaasanik nalilersuisussatut kommunillu aningaasaqarneranik tamakkiisumik misissuisussatut ukiakkut 2023-mi suliaqartussanngortitaavoq. 

Ilisimannittut ilaat, avataanit siunnersortitut suleqataasimasut ilaat, eqqartuussivimmi ima nassuiaavoq:

- Tamakkiisumik oqaatigalugu, kommuni naatsorsueqqissaarnermik aningaasaqarniarnermillu ilisimasakippallaarpoq.

Ilisimannittup, Kalaallit Nunaanni ukiorpassuarni kukkunersiuisutut misilittagaqarluartup, akileraarutit piffissaq eqqorlugu akileraartarnermut aqutsisoqarfimmit akilerneqarsimannginnerat marsimi 2024-mi paasivaa.

- Aningaasaqarnermut pisortap akissarsianullu pisortap akileraarutinik akiliisimannginneq ilisimasariaqaraluarpaat. Akiliisimannginnerup malugineqarsimannginnera paasiuminaatsilluinnarpara, ilisimannittoq oqarpoq nangillunilu:

- Kimip (aningaasaqarnermut pisortaasimasoq, aaqq.) taassumallu naatsorsuuserisuata aningaasat taakku akilersimallugit qularutiginngilluinnarpaat, tamannali ilumuunnginnera naatsorsuutitigut takuneqarsinnaavoq.

Siunnersuisulli Akileraartarnermut Aqutsisoqarfik piginnaasaqarpallaarsorinngilai nangillunilu:

- Akileraartarnermut Aqutsisoqarfik siulliulluni iliuuseqarneq ajorpoq, ilisimannittoq oqarpoq akileraarutinillu akiitsoqarneq kommunip nammineerluni maluginiaqqusimanngitsuuppagu tamanna paasineqanngitsooratarsimasinnaasoraa.

Akileraartarfimmit saaffiginnittoqanngitsoq

Kommune Kujallermi aningaasaqarnermut maanna pisortaq, Arne Andersen, ilisimannittuni siullertut eqqartuussivimmut marlunngornermi aggersagaavoq.

Taassumap 2024-mi atorfinitsitaagami aningaasaqarnikkut ilungersunartoqarnera nalunngilluinnarpaa. Assersuutigalugu, aningaasaqarnermut aaqqissuussineq nutaaq pissutigalugu, 2021-mut, 2022-mut aamma 2023-mut naatsorsuutit suliarineqarsimanngillat.

Aningaasaqarnermut pisortaq kommunimi sulilernini pillugu ima oqarpoq: - 
- Aningaasaqarniarneq ajortutut oqaatigerusunngilara, nalunngilarali ilungersunartunik aaqqitassaqartoq, aningaasaqarnermut pisortaq kommunimi sulileqqaarnini pillugu taama oqarpoq.

Kommunip Akileraartarnermut Aqutsisoqarfik, siunnersortip akiligassat akilerneqarsimannginnerat malugeqqoreeraalu, nammineerluni attavigisimagaa, taanna eqqartuussivimmi nassuiaavoq.  

- Akileraartarnermut Aqutsisoqarfimmit akileeqqusissummik tigusaqarnermik saaffigineqarnermilluunniit eqqaamasaqanngilanga, aningaasaqarnermut pisortaq oqarpoq.

Akileraartarnermut Aqutsisoqarfimmit saaffiginnittoqarsimannginnera, illersuisup apeqqutimigut erseqqissarpaa.

- Paasisakka naapertorlugit, Akileraartarnermut Aqutsisoqarfiup akiligassaqartoqarnera ilisimanngilaa, aningaasaqarnermut pisortaq eqqartuussivimmi oqarpoq.

Kommunimi pisortaasimasoq Tine Pars aamma ilisimannittutut marlunngornermi qaaqquneqarpoq. Pisortaagallarami aningaasaqarnerup nakkutigineqarnera ajunngitsuunersoq unnerluussisussaatitaasunit aperineqarpoq.

- Taamaannerarneqarsinnaanngilaq. Taamaallaat isumaqarpunga aningaasaqarnermut aaqqissuussineq nutaaq atuutilersinneqarmat taama pisoqartoq, taanna oqarpoq ilassutigalugulu:

- Kommunip akileraarutinut akiitsui qanoq amerlatigisut takullugit tupaallaatigeqaara, taanna oqarpoq.

Pineqartoq eqqartuussivimmiittoq

Aningaasaqarnermut pisortaasimasoq Kim Rosendahl kommunimi aningaasaqarnermut akisussaanerpaanerani akileraarutissat akilerneqanngillat.

Taanna ilisimannittutut Københavnimiit videokkut marlunngornermi aggersagaavoq.

-  (Siunnersuisartoq, aaqq.) allaffinnut novembari 2023-mi iserpoq oqarlunilu akileraarutinut ernianik 3 million koruuninik akiitsoqartugut nalunnginneriga, Kim Rosendahl ajornartorsiummik paasinneqqaarnini pillugu oqaluttuarpoq.

Aningaasaqarnermulli pisortaasimasoq isumaqarpoq akileraarutit 2023-miit 2024-mullu akilerneqarsimasut, 2023-mili akiitsut erniaalu ingerlaannaq akilerneqarsinnaanngitsut:

- Karsi imaqanngilaq, Kim Rosendahl oqarpoq, akissuteqarnerminilu apeqqutigineqartoq, tassa kommunip akiligassaminik akiliisimannginnini ilisimasimaneraa, akissuteqarfigalugu ima itisiliivoq:

- Aap, akiligassanut akissaqannginnatta akiitsut ikiliniassammata naafferarlugit akilersorneqarnissaannut isumaqatigiissusiorpunga.

Kommuni kukkuluttortoq 

Unnerluussisussaatitaasup Kristian Buskov Nierhoffip ullormut eqqartuussineq, Kommune Kujalleq akileraarutinik eqqortumik nalunaaruteqarsimagaluarlutik akileraarutinik akiliinnginnerat piaaraluni imaluunniit sumiginnaarujussuarnikkut unioqqutitsinertut taallugu naggasiivoq.

- Kommune Kujalliup aningaasaqarniarnera ajorluinnarpoq. Akileraartarnermut tunngasunuinnaanngitsoq, aningaasaqarniarneralli tamarmi ajorluinnarpoq, unnerluussisussaatitaasoq inaarutaasumik oqaaseqaammini oqarpoq kingusinnerusukkullu ima ilassuteqarluni:

- Ukiorpassuarni kukkuluttorsimapput maannalu tamanna nassuerutigiumanngilaat. 

Illersuisulli eqqartuussissuserisoq Charlotte Pedersen isumaqarpoq, kommuni piaaraluni imaluunniit ingasattumik sumiginnaalluni pisimanngitsoq.

- Akileraartarnermut Aqutsisoqarfimmit qisuariartoqanngilaq. Kommuni unneqqarilluni aningaasanik akiitsoqarnerarmat aatsaat paasivaat, illersuisoq eqqartuussissuserisoq oqarpoq ilassutigalugulu:

- Aajuna kommuni unneqqarissoq Akileraartarnermut Aqutsisoqarfimmit akiligassinneqarnermik akineqartoq.

Taassumap akiligassiissut ikilerujussuarneqartariaqartutut isumaqarfigaa.

Eqqartuussisup eqqartuussutip marlunngornermi apriilip 28-anni nalunaaqutaq qulinut oqaatigineqarnissaa naggasiutigaa.