Kommunip akileraartarnermut procenti ataatsimik qaffakkaa
Naqqiissut 03.12.2025, nalunaaqutaq 10.50: Kommune Kujalleq ilanngutassiap saqqummersinneqarnerata kingorna erseqqissaateqarniarpoq - tassa ilanngutassiami siusinnerusukkut Kujalliup Namminersorlutik Oqartussanut akileraarutinut akiitsuminik akiliinissaanut atukkaminut naafferaartumik taasersuinissama naalakkersuisunit akuerineqarnissaa utaqqineqartoq allassimavoq. Kommune Kujallerli Aningaasaqarnermut Akileraarutinullu Naalakkersuisunut qinnuteqaammik suli nassiussinngilaq. Oqaaseqatigiit ilanngutassiami allanngortinneqarpoq.
- Akileraarutitigut isertitassat aappaagumut 25 millionit koruuninik amerlanerunerat aatsaat ippassaq paasissutissiissutigineqarpoq.
Aningaasaqarnermut Inuussutissanullu Ataatsimiititaliamit Stine Egede (IA) missingersuutit sapaatip akunnerata siuliani isumaqatiginninniutigineqarnerata kingorna oqarpoq.
Kommune Kujallermi ukiup tulliani aningaasatigut isertitassat naatsorsuutigisamiit 31 millionit koruuninik amerlanerussasut tassani saqqummiunneqarpoq. Tamanna pissutigalugu aappaagumut akileraarutinut qaffaanissaq oqaluuserineqarsimasutulli qaffasitsigissanngilaq.
Kommunalbestyrelsip missingersuutit isumaqatiginninniutigineqannginnerini akileraarut 2 procentimik qaffanniarlugu oqaluuserisimagaluarpaa.
- Tassa akiligassap innuttaasunut tutsinnissaa pinaveersaartipparput. Skatteprocentip ataasiinnarmik qaffannissaa anguarput, taavalu sipaarniarnerit uku annertuut innuttaasunut annernartussaagaluit pinaveersaartillugit, borgmesteri Malene Vahl Rasmussen (D) isumaqatiginninniarnerit kingorna KNR-imut oqarpoq.
Kommune Kujallermi akileraarut 2024-mi procentimik ataatsimik apparneqarpoq, kommunilli taanna qaffaqqittariaqarpaa.
- Aningaasaleerusukkatta meeqqerivinnut, atuarfinnut, utoqqaat illuinut, ineriartornermut. Taakkuukua nuukkusulertitsisussaasut, borgmesteri oqarpoq.
Aningaasaqarneq ilungersuutaaqisoq
Kommune Kujallermi aningaasaqarnermi pissutsit ajornartorsiutaasimapput.
Kommune Kujallermi Naatsorsuuserinermi kukkunerpassuit 2024-mi missingersuutinut atatillugu 8 millionit koruuninik atuivallaarnermik kinguneqarput. Tamatuma saniatigut Aningaasaqarnermut Ataatsimiititaliap A-skatinik Namminersorlutik Oqartussanut qaammatini pingasuni akiliisoqarsimanngitsoq ukioq taanna aamma paasivaa. Taakku 40 millionit koruunit missaannik naleqarput.
Akileraarutinut akiitsut kommunip aalajangersimasumik ernialimmik 75 millionit koruuninik taarsigassarsinikkut akiliutigeriaannagassanillu 25 millionit koruuninik tarsigassarsinikkut akilersimagai, Kommune Kujalleq KNR-imut mailikkut allappoq.
Kommune Kujalleq 70 millionit koruunit missaannik amigartooruteqartoq danskit tusagassiorfiata, TV2-p ukioq manna saqqummiuppaa.
Kommune 47 millionit koruuninik sipaarniartariaqartoq qaammatip siuliani nalunaarutigineqarpoq.
- Kisitsit oqaatigissallugu annernarpoq. Kisitsisaanera kisiat pissutiginagu, kisianni koruunit tamarmik kiffartuussinermut, inummut, suliniummulluunniit annikinnerusinneqariataarsinnaanerannik pissuteqarluni, Kommune Kujallermi borgmesteri, Malene Vahl Rasmussen (D) inoqatinut attaveqaatikkut LinkedIn-ikkut taamani allappoq.
Borgmesterili nuannaartoq missingersuutit pillugit isumaqatiginninniuteqarnerup kingorna anillappoq.
- Nuanneq tassunga killittugut, sapaatip akunnera matuma siorna taamaattoqanngikkaluarpoq, Malene Vahl Rasmussen missingersuutit isumaqatiginninniutigineqarnerisa kingorna KNR-imut oqarpoq.
Pitsaasumik nalunaaruteqarneq borgmesterip oqarnera naapertorlugu kommunip Namminersorlutik Oqartussanut akileraarutitigut taarsigassamik naafferarlugit akilersornissaannut pilersaarutertik, Naalakkersuisunit akuerineqarnissaanik naatsorsuuteqarneranik ilaatigut pissuteqarpoq.
Taassuma tamanna KNR-imut oqarasuaatikkut ippassaq uppernarsarpaa.
- Naalakkersuisut GrønlandsBankenilu qanimut oqaloqatiginikuuagut, taakkulu pissutsinut atukkatsinnut paasinnilluarput. Taamaalilluta missinngersuutit kommunalbestyrelsimit tamarmiusumit akuerineqartissinnaasimavagut, tamanna aningaasaqarnikkut pissutsinit ingerlariaqqinnissatsinnut qulakkeerinnissutaavoq, borgmesteri KNR-imut oqarpoq.
Kommune Aningaasaqarnermut Akileraarutinullu Naalakkersuisumut, Múte B, Egedemut qinnuteqarnissaminnut GrønlandsBankenimut naafferaartumik taarsersuinissamut isumaqatigiissusiorsinnaanissaminut akuerineqarnissartik utaqqigitsik mailikkut akissuteqarnerminni itisilerpaat.
- Suliaq taanna suli aallunneqarpoq. Naafferaartumik taarsersueriaatsimik oqaratta taarsersuinerup qanoq sivisutiginissaa pivarput, kommune allappoq.
Sinneqartooruteqarnissaq pisariaqartoq
Kommune Kujalleq aningaasaqarnerliornerarlunni nalunaarutigineqareersoq qanoq ililluni 31 millioninik sinneqartooruteqarnermik missingersuusiortoqarsinnaasoq KNR-ip Kommune Kujalleq aperaa.
- Aningaasaqarneq suli ilungersunartorsiutaavoq, kommune allakkatigut akissummi allappoq.
- Kommuni Namminersorlutik Oqartussanut 2025-mi upernaakkut tarsigasssarsiat pillugit isumaqatigiissuteqarnermini ukiuni arlalinni naafferaaniarluni pisussaaffilerpoq, kommunillu tigoriaannarnik aningaasaanik sillimmateqarnissamut piumasaqaatit naammassiniarlugit sulissutigaa, kommune allappoq.
Atukkanik taarsiisuussaanerup aningaasanilu tigoriaannaateqarnissamut sillimmasiornerup (ileqqaarnertut ittumik) saniatigut kommunip 2024-mi amigartoorutit 70 millionit koruuniusut ” ukiut arlaqanngitsut” iluanni mumisittussaagai, mailikkut itisiliivoq.
- Anguniakkagut angusinnaajumallugit aamma akileraarutinik pisariaqartumik 1 procentimik qaffaanikkut akileraarutinit isertitat qaffakkiartornerisa kunguneranik 31 millionit koruuninik sinneqartooruteqarnissaq missingersuutigaarput,
