Kommune Kujalleq 47 millioninik sipaarniassasoq: - Politikkikkut uummatikkut anniarpunga

- Politikkikkut uummatiga anniarpoq.

Kommune Kujallermi borgmesterip, Malene Vahl Rasmussenip (D) inoqatinut attaveqaatikkut LinkedIn-ikkut allakkani taama aallarnerpaa.

Tamanna kujallermi politikerit aappaagumut missingersuutini 47 millionit koruuninik sipaarniartariaqarnerannik pissuteqarpoq. Tamannalu atugarissaarnermut sunniuteqassaaq.

- Kisitsit oqaatigissallugu annernarpoq. Kisitsisaanera kisiat pissutiginagu, kisianni koruunit tamarmik kiffartuussinermut, inummut, suliniummulluunniit annikinnerusinneqariataarsinnaanerannik pissuteqarluni.

Taassumali nalunaarutaa neriuuteqarnermik aamma ilaqarpoq. Taassumami inuussutissarsiornerup ingerlalluarnera uani eqqaavaa.

Malene Vahl Rasmussenilli oqarnera naapertorlugu oqaloqatigiinnerit ajornakusoortut pinngitsoortinnissaannut tamanna naammanngilaq.

Meeqqat Ataatsimeersuarnerat

Stine Egedep (IA) ukioq manna qinersisoqarnissaa tikillugu borgmesteriusup kommunip aningaasaqarnerlunnerani meeqqanut susassaqarfimmi aningaasartuuterpassuit pissutaanerarpai.

Sapaatip akunnerata naanerani meeqqat ataatsimeersuartinneqarput, Malene Vahl Rasmussenilu aamma peqataavoq.

Taannalu tassani nassuerutiginnippoq: Kommune Kujalliup meeqqanut takorluukkat meeqqat ataatsimeersuarneranni saqqummiunneqartut naammassisinnaanngilai.

- Aningaasaqarnikkut pissutsit pissutigalugit siunnersuutinit saqqummiunneqartut affaannaaluunniit piviusunngortissinnaanngilagut, taanna oqarpoq, nangillunilu:

- Uummatikkut anniarpunga, nalunngilarami siunissap pitsaanerulernissaanik upperinnikkunnarneq qanoq isumaqarnersoq, taanna LinkedInimi saqqummiussamini allappoq.

Aningaasaqarneq isumassuinerluunniit 

Malene Vahl Rasmussenip allakkamini kommunalbestyrelsemi suleqatini piffissami ilungersunaraluartumi nersualaarpai.

- Kommunalbestyrelsinni politikerigut pikkorinnerpaapput – inuit tamarmik immikkut sammisaminni sapiissuseqarlutik kommunitta nukittuumik sammiveqarnissaanut takorluugaqarlutillu sapiissuseqartut. Kisianni aningaasaqarneq kingornussarput, nammineq pilersitarinngisarput pillugu nikeriarsinnaanngilagut.

Borgmesterillu aningaasaqarnikkut akisussaaffiup inunnik isumassuinerup akornanni maannakkut aalajangiisoqartariaqarnerarpaa.

Taakku marluk akornanni aalajangerneq kommunip naak piffissaq sivisusinnaagaluartoq qaangersinnaassagaa neriuutigaa.

- Oqitsuinnaanavianngilaq, sukkanaviaranilu, kisianni unneqqarinnerullunilu angusassamik toraagaqarnerussaaq. Aqqutittami eqqortuunissaata qulakkeernissaa pisussaaffigaara, taamaaliornikkut aningaasaqarnermi akisussaassuseqarnerup inunnillu isumassuinerup akornanni siunissami aalajangertariaqaqqinnata taakku tamarmik ingerlaaqatigiiffigisaanik inuiaqatigiinnik pilersitsissalluta.