Toqutsisoq psykopatiusoq paarisassanngorlugu eqqartuunneqartoq
![](/sites/default/files/styles/image_934x467/public/article_images/330199402_548895967305999_3855472322260375021_n.jpg?itok=3HVhY-vO)
Eqqartuussisoqarfik Kujallermi angut 35-nik ukiulik piffissami killiligaanngitsumi paarineqartussanngortinneqarpoq.
Angut siorna februaarimi angutip 53-inik ukiullip niaqumigut ikinnerpaamik ataasiarluni siatsivimmik anaaneqarnerani, timimigullu annersarneqarlunilu isimmittarneqarnerani toqutsisimasutut eqqartuunneqarpoq.
- Misissueqqissaarnermit suliamik tigusigaangatta nalilertartarput, taamaammat pasineqartumik unnerluussigaangatta unnerluussut upperigipput isumaqartarpugut, taamaammat naammagisimaarluarpunga, Alexander Stürup eqqartuussivimmi aalajangiinerup kingunitsianngua oqarpoq.
Angutip eqqartuussut pinngitsuutinneqarnissani anguniarlugu Nunatta Eqqartuussisuuneqarfianut suliareqqitassanngortippaa.
Peqquserluttoqarnerani najuussimannginnermut uppernarsaatissaqanngitsoq
Toqutsineq Qaqortumi siorna februaarip pingajuata sisamaatalu akornanni pivoq, angullu saassussisoqarnerata kingorna ullualuit qaangiuttulli politiinit tigummineqalerpoq.
Maanna eqqartuunneqartoq pillugu eqqartuussineq ataasinngormalli aallartinneqarpoq, eqqartuussiviullu ulluni taakkunani ilisimannittut 16-it nassuiaateqartillugillu unnerluutigineqartoq nammineq aamma nassuiaateqartippaa.
Ilisimannittulli imaluunniit unnerluutigineqartup sivikitsumik nassuiaateqarnerata 2023-mi februaarip pingajuata sisamaatalu akornanni peqquserluttoqarnerani najuussimannginneranut uppernarsaatisitinngikkaa, suliami unnerluussisoq, Alexander Stürup oqarpoq.
Angulli pisumi pinngitsuuneraannaavippoq, toqutsinerlu isiginnittoqannginnerani pivoq, unnerluussisussaatitaasoq oqarpoq, itisiliillunilu:
- Toqutsisoqarsimanerani suliani pingaarnertut unammillernartartoq tassaavoq pinerlineqartup qanoq pineqarsimanerminik maaniilluni nassuiaateqarsinnaannginnera, taamaammat uppernarsaasiissutiginiakkat suliami uppernarsaatinut allanut atassuteqartariaqarput.
Taamaammat suliami ilisimannittut assigiinngitsut 16-it unnerluutigineqartup pinerlineqartullu pinerliisoqarnissaanut piffissap tungaanut susimaneranik erseqqissaanermut ikiuutaasussatut aggersarneqarput.
Pinerluttoqarsimaneranik misissueqqissaartartoq pinerluttoqarsimaneranillu misissuisartut marluk ilisimannittutut nassuiaateqartunut 16-inut ilaatigut ilaapput.
Sooruna paarineqartussanngortitsilluni piumasaqaateqartoq?
35-nik ukiulik pillugu eqqartuussivimmi suliaq annertuvoq, 1.853-inik atuagassartaqarpoq, toqungasumik misissuinermik nalunaarusiartaqarpoq, tarnikkullu misissuinermik nalunaarusiaqarluni.
Toqungasumik misissuinermit aamma tarnikkut misissuinermit nalunaarusiat eqqartuussivimmi saqqummiunneqarput, kingullertullu taaneqartoq naapertorlugu 35-nik ukiulk nalinginnaasumik pissusilinniit ima allaanerutigimmat psykopatitut nassuiaatigineqarpoq. Tamannalu pissutigalugu siunissami sakkortulluinnartumik pissusilersuuteqarnissaanut aamma aarlerinarluinnartoqarpoq, Alexander Stürup oqarpoq.
Angut nakuusersimasutut, pinngitsaaleeriarsimasutut eqqartuunneqarnikuuvoq, aamma Nunatta Eqqartuussisuuneqarfianit 2012-imi maanna eqqartuussaassutigisaanut assingulluinnartumi toqutsisimasutut ukiuni arfinilinni pineqaatissinneqarsimasunut inissiisarfimmiittusanngortinneqarnikuuvoq.
- Taamani suliami pinerlineqartoq niaqqumigut anaaneqarluni timikkullu isimmigarneqarluni aamma toqutaavoq, Alexander Stürup oqarpoq.
Angut siorna toqutsisimasutut maanna eqqartuunneqareerami suliap Nunatta Eqqartuussisuuneqarfiani suliarineqarnissaata tungaanut Nuummi pinerluuteqarsimasunut inissiisarfimmeeqqissaaq.