Peter Grønvoldimit kannguttaatsuliorfigineqarsimasut: Ikinnerpaat inoqamminnik politiinut nalunaarutiginnikkusuttarput
- Suli pulavallaarunanngilaq. Kisianni qamuuna ilukkut eqqissiallannartorujussuuvoq naqissuserneqarluni ilumut unioqqutitsisoqartoq, Jonna Lynge oqarpoq.
Taanna arnat KNI-mi pisortaanerusimasaminit Peter Grønvold Samuelsenimit kannguttaatsuliorfigineqarsimasutut unnerluussisut arfinillit ilagaat.
Peter Grønvold Samuelsen Eqqartuussisoqarfik Qeqqani qaammatini pingasumi pineqaatissinneqarsimasunut inissiisarfimmiittussassanngortinneqarpoq. Tamatuma saniatigut arnanut tamanut immikkut 5.000 koruuninik taarsiissuteqassaaq.
Eqqartuussineq arnat pineqartut ilaannut Eqqartuussisoqarfik Qeqqani Sisimiuni malinnaasumut misigissutsitigut kalluaavoq.
AAMMA ATUARUK Peter Grønvoldip eqqartuussissuserisua eqqartuussinerup kingorna: Sullitara pakatsingaatsiarpoq
- Soorunamili sakkortoqaaq. Psykiskimik tamaviaarnaqaaq. Soorunalimi una sageq sakkortugami naammassipallannissaa qilanaarinikuusimavarput. Taamaattumik aamma kinguaqattaarnera nukippassuarnik atuiffiunikuusimavoq, Victoria Olsen oqarpoq.
Eqqartuussineq piareersimatsiaq arnat kannguttaatsuliorfigineqarsimasut ilaat Paarnaq Mølgaard KNR-imit oqaaseqartipparput. Taanna aamma eqqartuussivimmi pisunit aalassasimaqaaq.
- Suliffeqarfiup iluani kannguttaatsuliorneq eqqarsaatigalugu, nipangiussimaneqarneq, ersinngitsoq ilumut naqissuserlugu eqqunngitsuusut pissutsit taamaattut eqqissiallannaqaaq, Paarnaq Mølgaard oqarpoq.
Pisortaq killissamik qaangiisoq
Paarnaq Mølgaardip, Victoria Olsenip aamma Jonna Lyngep KNI-mi atorfeqarnerminni pisortarisimasaminnit arlaleriarlutik kannguttaatsuliorfigineqartarsimallutik eqqartuussivimmi oqaatigaat.
Taakku allaffimmi ulluinnarni kissaatiginngisaminnik Peter Grønvold Samuelsenimit attuuaneqartarsimanertik nassuiaatigaat.
KNI-mi kannguttaatsuliornerit
Peter Grønvold Samuelsen kinguaassiutitigut kannguttaatsuliorsimasutut sulisut ilaannit politiinut unnerluutigineqarnera 2021-mi marsimi saqqummiunneqarpoq.
Tamanna sioqqutitsiarlugu Peter Grønvold Samuelsen ukiuni arfineq-marlunni pisortaanertut atorfimminit soraarsimavoq.
Eqqartuussiveqarfik Qeqqani suliaq silap ajorneranik, coronamik paasissutissanillu nutaanik takkuttoqarnera pissutigalugu pingasoriarlugu kinguartinneqarpoq, 2022-milu apriilip 19-iani eqqartuussut eqqortuutinneqarluni.
Apriilip ulluisa 19-ianni eqqartuussisoqarnerani arnaq alla sassarluni KNI-mi atorfeqarnermini Peter Grønvold Samuelsenimit aamma kannguttaatsuliorfigineqarsimanerarpoq.
Eqqartuussiviup unnerluutigineqartoq arnanut arfinilinnut tamanut kannguttaatsuliorsimasutut eqqartuuppaa.
Peter Grønvold Samuelsen qaammatini pingasuni pineqaatissinneqarsimasunut inissiisarfimmiittussanngortinneqarpoq. Tamatumalu saniatigut arnanut immikkut 5.000 koruuninik akiligassinneqarluni.
Eqqartuussiviup taamaalilluni unnerluussisussaatitaasut piumasaqaataat eqqortippaa.
Peter Grønvold Samuelsen eqqartuussivimmi suliap ingerlanera tamaat pinngitsuunerarpoq, pinngitsuutinneqarnissamillu piumasaqarluni.
Taassumalu illersuisuatalu eqqartuussut nunatta eqqartuussisuuneqarfianut suliassanngorteqqinniarpaat.
Suliaq qaqugu Nunatta Eqqartuussisuuneqarfianiissanersoq suli ilisimaneqanngilaq.
Attuuaneqarnerit tassaasinnaapput pukusukkut, qitikkut iviangequtimiluunniit nalaatigut assammik attorneqarneqarnerit, sivisuumik eqinneqarnerit ulussakkullu kuninneqarnerit.
Tamatuma saniatigut kinguaassiutinut tunngasunik oqaloqatigiinniartarsinnaavoq.
AAMMA ATUARUK KNI-mi pisortaasimasoq kannguttaatsuliortutut eqqartuunneqartoq: Pineqaatissinneqarsimasunut inissiisarfimmiittussanngortoq
Tamakku tamarmik suliffimminnik annaasaqarnissartik ernumassutigalugu naaggaarsinnaanngitsutut misigisimavaat.
Peter Grønvold Samuelsen eqqartuussivimmi suliap ingerlarnga tamaat pinngitsuunerarluni kannguttaatsuliorneragaanini tamarmik eqqunngitsuunerarpai.
Taassumalu arnat immineq inuttut oqallisiginerlunneqartinniarluni politiinut unnerluutigisimagaanni eqqartuussivimmi marlunngornermi oqaatigaa.
- Kulturimik allannguineq pisortaaneruninni peqataaffigisara assigiinngitsorpassuarnik allannguinernik nuannarineqarpallaanngitsunik ilaqarpoq. Tamanna narrutsattoqartitsisoq kisiat eqqoriarsinnaavara.
KNI-mit annerusoq
Arnalli suliamut tunngatillugu misigisimasatik attatiinnarpaat.
- Inuttut ilaqutariinnitsigut allatigullu naleqarnikorujussuuvoq. Kialluunniimmi immaqa kissaatiginngilaa inoqatini politiinut tunniutissallugu. Kisianni uani tassa uagut nalusimanngilarput eqqunngitsumik pineqarluta. Aqqutaa imaannanngitsorujussuuvoq, Jonna Lynge oqarpoq.
Taassuma eqqartuussut isumaqartorujussuusoraraa.
AAMMA ATUARUK Arnap allap KNI-mi pisortaasimasoq aamma unnerluutigigaa
- Isumaqarpunga siunissami massakkullumi isumaqartorujussuussasoq. Arnaannannngitsunut immaqa inuiaqatigiinnut tamanut, generationillu tullianut. Uku pisarnikut KNI-miinnaanngitsoq pisarput. Nunarsuaq tamakkerlugu pisarput, kisianni immaqa oqallisigineqarneq ajorput, paquminarput, tanna oqarpoq, nangillunilu:
- Immaqa aamma arnarpassuit taamatut iliorfigitikkaluarlutik, misigisaraluarlugu iluaagalugu eqqunngitsumik pineqarsoralutik, immaqa nalusarpaat qanoq iliussanerlutik. Immaqa kanngutsiinnartarput. Neriuppunga tamakkua ammanerusumik eqqartorneqalissasut taavalu aamma eqqunngitsumik pineqarsorigaanni iliuuseqartoqassasoq, Jonna Lynge oqarpoq.
Nunatta eqqartuussisuuneqarfianut suliassanngortikkaa
Paarnaq Mølgaardip kannguttaatsuliorfigineqarnermik misigisimasut tamarmik erngertumik iliuuseqartarnissaannik kaammattuuteqarfigai.
- Kaammattorusuppakka piaartumik iliuuseqassasut. Aamma eqqunngitsuuvoq suliffeqarfiup iluani akueriinnangassaanngillat. Ingasappoq taamatut pisortaanerminngaanniit iliuuseqarfigineqarluni. Killileruminaatsumik, Paarnaq Mølgaard oqarpoq.
Eqqartuussiviulli eqqartuussuteqarneratigut suliaq naammassinngilaq. Peter Grønvold Samuelsenip taassumalu illersuisuata, Finn Meinelip suliaq suliassanngorteqqippaat, taamaammat suliaq Nunatta Eqqartuussisuuneqarfiani suliassanngortinneqarpoq.
Arnat arfinillit taamaalillutik ilisimannittutut nassuiaateqaqqillutik misigisimasatik oqaluttuareqqissavaat.
Tamannali arnat anusinnguutiginngilaat.
- Piareersimavunga. Nukissaqartippara, Victoria Olsen oqarpoq.