Arnap allap KNI-mi pisortaasimasoq aamma unnerluutigigaa
Arnat tallimat Peter Grønvold Samuelsenip eqqartuussaanerani ilisimannittutut nassuiaateqareerput, taakkulu taassuma KNI-mi pisortaanerani qanoq iliuuseqarfigineqartarsimanertik nassuiaatigaat.
Sisimiuni Eqqartuussisoqarfik Qeqqani arnamik allamik ullumi aamma nassuiaateqartoqarpoq. Taassuma pisortarisimasani apriilimi unnerluutigaa, taannalu Ilulissanit videoliuutikkut peqataavoq.
Unnerluussummut ilassut naapertorlugu KNI-mi pisortaasimasup piffissami aalajangersimasumi taaneqanngitsumi KNI-p Sisimiuni allaffeqarfiani pisumi ”arlaleriarluni iviangiatigut attuualaartarsimavaa” arlaleriarlunilu ”pinnguaqatigerusuppakkit” aamma ”atoqatigerusuppakkit” imaluunniit taakkununnga assingusut tassunga oqaatigisarsimavai.
- Nutaarsiassatigut malinnaavunga. Aallaqqaammut peqataarusukkaluarlunga nukissaqarfigisimanngilara, taanna eqqartuussivimmi oqarpoq.
Maskiinamit nipi
Peter Grønvold Samuelsen kinguaassiutitigut kannguttaatsuliorsimasutut sulisut ilaannit politiinut unnerluutigineqarnera siorna marsimi saqqummiunneqarpoq.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Arnap aatsaat maanna unnerluutiginnittup oqarnera naapertorlugu Peter Grønvold Samuelsen sulianut tunngatillugu pisortaalluartuuvoq. Taannali atoqatigiinnermut tunngasumik oqaaseqataarajullunilu arlaleriarluni attuualaartarsimavaani.
Taanna pisimasumik immikkut eqqaamaniagaqarpoq, tassa maskiinap eqqaaniissimavoq. Maskiina nipitoqimmat taassuma tunuminit aggerluni iviangiminik tigusinera tusaanngitsoorpaa. Illalaaginnarsimavoq, ilukkulli kamassimalluni.
AAMMA ATUARUK KNI-p pisortarisimasaanik eqqartuussineq sisamassaanik ullumi aalajangiiffigineqariassasoq
- Imminut illersorsinnaannginnama. KNI-p iniutaani najugaqarlungalu meeraqarpunga. Ilukkut kamappunga, silarlikkulli illaannarlunga, qanormi iliornissara naluara.
Peter Grønvold arnanut allanutulli tassunga kannguttaatsuliorsimannginnerarpoq.
Ilisimannittutut nassuiaateqartoq pinnguaqatigerusullugu oqarfiginikuuiuk, unnerluussisussaatitaasoq oqarpoq.
- Taamaaliorsimanngitsunga isumaqarpunga, Peter Grønvold oqarpoq.
Atoqatigerusullugu oqarfiginikuuiuk?
- Naamik.
Attuuanikuuiuk?
- Taamaaliornikuunngilanga.
"Oqallisiginerlutsinniaraannga"
Peter Grønvoldip oqarnera naapertorlugu arnat arfinillit immineq inuttut oqaatigerlunniarlutit taassuminnga politiinut unnerluussipput. Taassuma KNI-mi pisortaalernerani ”kulturimik allannguineranik” tamanna aallaaveqartoq, taanna oqarpoq.
- Kulturimik allannguineq pisortaaneruninni peqataaffigisara assigiinngitsorpassuarnik allannguinernik nuannarineqarpallaanngitsunik ilaqarpoq. Tamanna narrutsattoqartitsisoq kisiat eqqoriarsinnaavara.
Ilisimannittoq alla ullumi aamma nassuiaateqarpoq. Taanna politiassistentiuvoq, taassumalu suliap unnerluussisussaatitaasunut tunniunneqannginnerani eqqartuussivitsigoortinneqalinnginneranilu arnanik arfinilinnik killisiuisuuvoq.
Taassuma arnat KNI-mi pisortarisimasaminnik unnerluussinerminni ersingaatsiarsimasut nassuiaatigaa. Politiassistenip arnat imminnut tapersersoqatigiissimasut ingerlariaqqinnissaminnullu ikiortissamik pisariaqartitsisimasut oqaatigaa. Taassuma arnat Peter Grønvoldimik eqqartuinerlunniarnissamut pilersaarusiorsimasorinngilai.
Eqqartuussivimmi suliaq ullumi kingusinnerusukkut aalajangiiffigineqassaaq.
Unnerluussisussaatitaasup qaammatinik pingasunik pineqaatissiinissaq piumasarigaa
61-inik ukiulik, Peter Grønvold Samuelsen pinerluttuliornermi inatsit paragraf 84 naapertorlugu unnerluutigineqarpoq. Tassa imaappoq arnanut arfinilinnut kannguttaatsuliorsimasutut pasineqarluni unnerluutigineqarpoq.
Kannguttaatsuliornerit KNI-p Sisimiuni allaffiani aamma sulinermi angalanerni piffissami 2016-imi 2021-mut pisimanerarneqarput.
Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
AAMMA ATUARUK KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai
Peter Grønvold Samuelsen pasilliutigineqartut tamarmik eqqunngitsuunerarlutik pinngitsuutinneqarnissaminik piumasaqarpoq, unnerluussisussaatitaasullu qaammatini pingasuni pineqaatissinneqarsimasunut inissiisarfimmiitsitsisoqarnissaa piumasaralugu.
Pisortaasimasup eqqartuussaanera pingasoriarlugu kinguartinneqarnikuuvoq.
KNI-p pisortarisimasaata kannguttaatsuliorsimasutut politiinut unnerluutigineqarnera 2021-mi marsimi saqqummiunneqarpoq.
Tamanna sioqqutitsiarlugu Peter Grønvold Samuelsen atorfimminit soraarsimavoq.
Taanna KNI-mi ukiuni arfineq-marlunni pisortaaneruvoq.
