KNI-p pisortarisimasaanik eqqartuussineq sisamassaanik ullumi aalajangiiffigineqariassasoq
Eqqartuussiveqarfik Qeqqatap KNI-p pisortarisimasaanik Peter Grønvoldimik sulisunut tallimanut kannguttaatsuliorsimanerarneqarnerani eqqartuussinerani ullumi aalajangiiniartoqaqqissaaq.
Eqqartuussineq nalunaaqutaq ullaakkut qulingiluanut aallartissasoq ilisimannittullu marluk nassuiaateqartinneqassasut, eqqartuussisoq, Louise Skifte KNR-imut oqarpoq.
Eqqartuussineq pingasoriarlugu kinguartinneqareernikuuvoq. Siullermik illersuisoq unnerluussisussaatitaasorlu Nuummi mittarfiup quasarnera pissutigalugu decembarimi tikinngitsoorput.
Tullissaani ilisimannittoq coronamik tunillatsissimammat februaarimi kinguartitsisoqarpoq.
Pingajussaanillu marsip ulluisa 24-anni kinguartitsisoqarluni. Tassanilu eqqartuussinerup ingerlanerani paasissutissanik nutaanik saqqummertoqarpoq, taamaalilluni ullormi tassani aamma eqqartuussut naammassineqarnani.
Peter Grønvoldip eqqartuussissuserisullu suliaq Nuummiit malinnaaffigigaat
Illersuisup, Finn Meinelip unnerluussisussaatitaasullu Anne Clintonip paasissutissat suut pineqarnersut nalunaarutigiumanngilaat.
- Soorunami kinguartitsisoqarnera illuatungeriinnut uggornartorujussuuvoq. Suliaq naammasserusupparput, Anne Clinton KNR-imut marsip ulluisa 24-anni oqarpoq.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa
- Aap, pakatsinaqaaq. Piossutsilli suliamio matumani pingaaruteqartut saqqummiunneqarnissaat pingaaruteqarpoq, Finn Meinel oqarpoq.
KNI-p pisortarisimasaa, Peter Grønvold taassumaluunniit eqqartuussissuserisua Sisimiuni eqqartuussivimmi ullumi najuutissanngillat. Taakku eqqartuussineq Nuummi eqqartuussivimmit videoliutikkut malinnaaffigissagaat, eqqartuussisoq, Louise Skifte oqarpoq.
Pinngitsuunerartoq
Peter Grønvold arnanut tallimanut kannguttaatsuliorsimanerarneqarnerminut pinngitsuunerarpoq. Kannguttaatsuliornerit KNI-p Sisimiuni allaffiani aamma sulinermi angalanerni piffissami 2016-imi 2021-mut pisimanerarneqarput.
Ilisimannittut nassuiaateqartut naapertorlugit taakku pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
Peter Grønvoldip taassumalu eqqartuussissuserisuata pinngitsuutitsisoqarnissaa piumasaraat unnerluussisussaatitaasullu qaammatini pingasuni pineqaatissinneqarsimasunut inissiisarfimmiitsitsisoqarnissaa piumasaralugu.
KNI-p pisortarisimasaata kannguttaatsuliorsimasutut politiinut unnerluutigineqarnera 2021-mi marsimi saqqummiunneqarpoq.
Peter Grønvold Samuelsen tamanna sioqqutitsiarlugu atorfimminit soraarnikuuvoq. Taannalu KNI-mi ukiuni arfineq-marlunni pisortaanerusimalluni.
