KNI-mi pisortaasimasoq kannguttaatsuliortutut eqqartuunneqartoq: Pineqaatissinneqarsimasunut inissiisarfimmiittussanngortoq
Peter Grønvold Samuelsen KNI-mi pisortaanermi nalaani sulisut arlalinnut kannguttaatsuliorsimasutut Eqqartuussiveqarfik Qeqqap piumasaqaatitaqanngitsumik qaammatini pingasuni pineqaatissinneqarsimasunut inissiisarfimmiittussanngortillugu eqqartuuppaa.
Tamanna Sisimiuni eqqartuussiveqarfiup suliaq pingasoriarlugu kinguartinneqarsimasoq ullumi nangeqqereerlugu aalajangerpaa.
Peter Grønvold Samuelsenilu arnanut tamanut immikkut 5.000 koruuninik akiliisussanngortinneqarpoq.
KNI-mi pisortaasimasoq taamaalilluni arnanut arfinilinnut politiinut unnerluutiginnittunut tamanut kanngutttaatsuliorsimasutut eqqartuunneqarpoq.
- Qullersaalluni aqutsisuunermini pissaanermik atornerluinera sulisuminullu kannguttaatsuliornera eqqartuussiviup pisunut sakkortusaataatippaa, eqqartuussisoq eqqartuussummik suaaruteqarnermini oqarpoq.
Peter Grønvoldip taassumalu eqqartuussissuserisuata eqqartuussut pinngitsuutitsinneqarnissamik piumasaqaateqarlutik suliassanngorteqqippaat, suliaq taamaalilluni piffissami allami Nunatta Eqqartuussisuuneqarfiani maanna suliarineqartussanngorluni.
Suliffimmi sulinerminilu angalanermi kannguttaatsuliornerit
Eqqartuussisup eqqartuussummik nipilimmik atuaannginnerani unnerluussisussaatitaasup, Anne Clintonip kannguttaatsuliornermik suliaq alla, tusagassiuutitigut aamma saqqumilaangaatsiarsimasoq innersuussutigaa, tassa Siumumi partiimi allattaasimasup, Mikael Petersenip eqqartuunneqarnera.
Taanna arnanut pingasunut kannguttaatsuliorsimasutut eqqartuunneqarpoq.
- Suliaq una tassunga assinguvoq, pissutigalugu suliat taakku pissutsini pingaannginnerusuni pingaartunilu pisuupput. Suliami matumani pinerluuteqarfigineqartut marloriaammik amerlanerunerat pisullu suliamit allamit nutaajunerunerat pissutigalugit sakkortunerusumik pineqaatissiisoqartariaqarpoq, unnerluussisussaatitaasoq oqarpoq.
Eqqartuussisullu tassunga tusarnaarpoq - eqqartuussisorlu unnerluussisussaatitaasut tunngavilersuutigisaat malillugu piumasaqaatitaqanngitsumik qaammatini pingasuni pineqaatissinneqarsimasunut inissiisarfimmiittussanngortitsinissamik eqqartuussivoq.
Suliami illersuisup, Finn Meinelip uppernarsaatinut annerusumik piumasaqaateqartoqarnissaa piumasaraa.
- Ilisimannittutut nassuiaateqartut politiinit apersorneqarnerminni nassuiaatinut imminnut tusarnaarsimanerat tatiginninnermik anniillisitsivoq. Arnat pisut assigiinngitsut qangarpiaq pisimanerannik oqaaseqarsinnaannginnerat ilisimannittut nassuiaataannut sakkukillisitsipput.
Unnerluussisussaatitaasup, Anne Clintonip suliani ima ittuni paasissutissanik assersuutigalugu nakkutilliinermi assinik imaluunniit teknikkikkut paasissutissanik tigussaasoqarpiartannginnera erseqqissaatigaa. Ilisimannittutut nassuiaateqarnerit kisimiipput.
- Arnat nassuiaatigisaat tutsuiginartuupput. Nalaassimasut assigiinngitsut arlaartut pillugit inuttut nassuiaatigaat, unnerluussisussaatitaasoq oqarpoq.
Taassuma oqarnera naapertorlugu arnat nassuiaatigisaminnut tusarsimanerat ataatsimoorlutik Peter Grønvoldimik unnerluutiginninnissaannut sapiissuseqalersitsivoq.
Kissaatiginngisamik attuuaneqarneq
Eqqartuussivimmi suliaq ullaaq manna qulinut aallartippoq, ullumilu eqqartuussinermi marluk ilisimannittutut nassuiaateqarput.
61-inik ukiulik, Peter Grønvold Samuelsen arnanut arfinilinnut Namminersorlutik Oqartussat suliffeqarfiutaanni sulisunut kannguttaatsuliorsimanerarneqarluni unnerluutigineqarpoq.
Kannguttaatsuliornerit KNI-p Sisimiuni allaffiani aamma sulinermi angalanerni piffissami 2016-imi 2021-mut pisimanerarneqarput.
AAMMA ATUARUK Arnap allap KNI-mi pisortaasimasoq aamma unnerluutigigaa
Arnat arfinillit atorfeqarnermi nalaanni pisortarisimasaminnit kissaatiginngisaminnik attorneqartarlutik eqqartuussivimmi oqaatiginikuuaat.
Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
Peter Grønvold Samuelsen pasilliutigineqartut tamarmik eqqunngitsuunerarlutik pinngitsuutinneqarnissaminik piumasaqarpoq, unnerluussisussaatitaasullu qaammatini pingasuni pineqaatissinneqarsimasunut inissiisarfimmiitsitsisoqarnissaa piumasaralugu.
Eqqartuussineq pingasoriarlugu kinguartinneqartoq
Pisortaasimasup eqqartuussaanera pingasoriarlugu kinguartinneqarnikuuvoq.
Siullermik illersuisoq unnerluussisussaatitaasorlu Nuummi mittarfiup quasarnera pissutigalugu Sisimiunut decembarimi tikinngitsoorput.
Tullissaani ilisimannittoq coronamik tunillatsissimammat februaarimi kinguartitsisoqarpoq.
Pingajussaanillu marsip ulluisa 24-anni kinguartitsisoqarluni. Tassanilu eqqartuussinerup ingerlanerani paasissutissanik nutaanik saqqummertoqarpoq, taamaalilluni ullormi tassani aamma eqqartuussut naammassineqarnani.
KNI-p pisortarisimasaata kannguttaatsuliorsimasutut politiinut unnerluutigineqarnera 2021-mi marsimi saqqummiunneqarpoq.
Tamanna sioqqutitsiarlugu Peter Grønvold Samuelsen atorfimminit soraarsimavoq.
Taanna KNI-mi ukiuni arfineq-marlunni pisortaaneruvoq.
