Persuttaanermi pinerlineqartoq Rigshospitalimukaanneqartoq
Innuttaasut arlallit 19-inik ukiulik, Minik Olinnguaq Konrad Olsenip ujaarineqarneranut atatillugu paasissutissaateqarlutik Kalaallit Nunaanni Politiinut saaffiginnipput.
Sisimiuni politikommissæri, Karl Jørgen Lennert KNR-imut taama paasissutissiivoq.
Angut inuusuttoq Sisimiuni 2023-mi decembarip 23-ani nal. 03.15-ip missaani persuttaasoqarneranut atatillugu ujaarineqarpoq. Angut Sisimiuni imerniartarfiup Starlightip silataani kingullermik takuneqarpoq.
- Arlalinnik misissuiffigisatsinnik saaffigineqarpugut, kisianni suli maannamut inerneqanngillat.
Karl Jørgen Lennert annikitsuinnarnik paasissutissaateqarpoq.
- Misissuisoqartoq taamaallaat oqaatigisinnaavara. Misissuinermi qanoq alloriarsimanerluta oqaaseqarsinnaanngilanga, taanna saassussisoqarneranit sapaatit akunneri marlungajaat qaangiuttut, tallimanngornermi ullaap tungaani oqarpoq.
Rigshospitalimukaanneqartoq
Politiit Minik Olinnguaq Konrad Olsenip sumiissinnaaneranik ilimagisaqarnersut politikommissærip oqaatigisinnaanngilaa.
- Ilimagisaqanngilagut. Taamaakkaluarpat eqqoriaaneruinnalissagami.
Karl Jørgen Lennertilli persuttaanermi pinerlineqartoq Københavnimut Rigshospitalimukaanneqartoq paasissutissiissutigaa.
Minik Olinnguaq Konrad Olsen ima nassuiaatigineqarpoq, 175 centimeterimik angissuseqartoq, qernertunik nujalik nalinginnaasumillu timeqartoq. Atisarisai ilisimaneqanngillat.
Ujaarineqartoq navianarsinnaavoq, taamaammat takugaanni imaluunniit sumiinneranik paasissutissaateqartoqaruni politiit oqarasuaammut 701448-mut saaffigineqarsinnaapput.