Aningaasanik peqquserluutinik malunnarunnaarsaasarneq pillugu inatsit nutaaq: Peqquserlunniat nunatsinni periarfissagissaarnerusinnaanerat politikerit ernumassutigigaat
Inatsit aningaasanik peqquserluutinik kontumut nuussinissamik imaluunniit aningaaseriviit marluk akornanni aningaasanik nuussinissamik ajornarnerulersitsisussaq Folketingimi partiit isumaqatigiissut marlunngormat akuersissutigaat.
Aningaaseriviit taakkulu sullitaat ilaatigut inuit aningaasanik nuussisut pillugit paasissutissanik amerlanerusunik siunissami pissarsisinnaasalissapput.
Inatsit Danmarkimi atuutereerpoq EU-llu aningaasanik peqquserluutinik malunnarunnaarsaasarneq pillugu maleruagassiai 2015-imeersut tamatumani tunngavigineqarlutik.
AAMMA ATUARUK Aningaasanik malunnarunnaarsaasarneq akiorniarlugu inatsisissaq tuaviuunneqartoq
Danmarkimi aningaasanik peqquserluutinik malunnarunnaarsaasimasutut eqqartuunneqartut sualuttumik piaaralutilluunniit aningaasanik peqquserluutinik malunnarunnaarsaasimasutut parnaarussassanngortinneqarlutik pineqaatissinneqarsinnaapput. Nunatsinnili taama iliortut Pinerluttulerinermi inatsit naapertorlugu akiligassinneqarlutik pineqaatissinneqartarput.
Taamaammat nunatsinni pillaasarnerup Danmarkimut naleqqiullugu sakkukinnerunera pissutigalugu nunatta aningaasatigut peqquserluuteqarnissamut pinerlunnianit siunissami atornerlunniarneqarsinnaanera Folketingip Kalaallit Nunaannut tunngasunut ataatsimiititaliaanit ernumassutigineqarpoq.
AAMMA ATUARUK Suliassat pingasut isiginiagassatit aajuku
Danskit naalakkersuisui ataatsimiititaliamit kajumissaarneqarput aningaasanik peqquserluutinik malunnarunnaarsaasarnermut pillaatigineqartartoq pillugu Namminersorlutik Oqartussat isumaqatigiinniarfigineqassasut.
- Pineqaatissiissutigineqartut sukannernerulersinnissaat naleqqunnerussanerpa, soorlu assersuutigalugu Kalaallit Nunaanni Pinerluttulerinermi inatsimmi aningaasanik nuussinermut peqqussutinik allanik unioqqutitsinermut pineqaatissiissuteqarnikkut, taamaaliornikkut Kalaallit Nunaat pineqaatissiissuteqartarnikkut sakkukinnerusumik inissisimajunnaarsikkumallugu, Folketingip Kalaallit Nunaannut tunngasunut ataatsimiititaliaata isumaliutissiissutaani tamanna atuarneqarsinnaavoq.
