Upernaakkut ataatsimiinneq: Suliassat pingasut isiginiagassatit aajuku

Upernaakkut ataatsimiinnermi siunnersuutit 101-iummata oqallinnissamillu siunnersuutit 19-iummata malinnaaniarneq ajornarsinnaavoq. Taamaammat sammisat pingasut malinnaaffigisinnaasatit uaniipput. Sammisassaq ataaseq sivisuumik suliarineqarpoq, ataaseq inuiaqatigiit ajornartorsiutigaat angisooq ataaserlu nunatsinni politikkimi ukiorpassuarni mamianartuliornerusartumut sammivoq.

1: Innarluutillit pillugit inatsit

Innarluutillit pillugit inatsit ukioq manna januaarip aallaqqaataani atulertussaagaluarpoq. Inatsisip innarluutilinnut inatsit ukiunik 25-nik pisoqaassusilik 1994-imeertoq taarsertussaavaa. Inatsisip kinguartinneqarneranut inatsisip piareerneqannginnera pissutaavoq. Inatsit taamani innarluutillit illersuisuanit innarluutillillu peqatigiiffiannit ilaatigut isornartorsiorneqarpoq.

Innarluutillit pillugit inatsit imaluunniit inatsit inunnut innarluutilinnut tapersersuisussaq Inatsisartut upernaakkut ataatsimiinneranni suliarineqaqqittussanngorpoq. Innarluutillit illersuisuat tassunga atatillugu inatsisip suliarineqarneranut nersualaarivoq. Christina Johnsen naapertorlugu inatsit sukateriffiuvoq.

AAMMA ATUARUK Ernini naammaginartumik ikiorserneqarniassammat Danmarkimut nuulersut

Innarluutillit pillugit suliat ukiaq manna sammineqangaatsiarput. Inuit pisinnaatitaaffii pillugit instituttip innarluutilinnut susassaqarfik nalunaarummi februaarimi isornartorsiorpaa innarluutilippassuillu atugassarititaasut pitsaannginnerat pissutigalugu nunatsinnit aallartarnerat maluniartillugu.

Innarluutillit pillugit inatsit innarluutilinnut susassaqarfiit pillugit siunnersuutinik allanik aamma ilaqarpoq. Nunatta Naalagaaffiit Peqatigiit innarluutillit pillugit isumaqatigiissutaannik malinninnissaanik qulakkeerinissaa pillugu iliuusissatut pilersaarusiornissaq, Inuit Ataqatigiit siunnersuutigaat. Partiilu taanna Aasianni arlalinnik innarluutilinnut ulloq unnuarlu paaqqinniffeqalernissaanik aamma siunnersuuteqarpoq.

Naalakkersuisut aamma isiginiarnermik allatigulluunniit innarluutillit soorlu atuakkanik atuakkanillu immiussanik atuarsinnaanissaat tusarnaarsinnaanissaallu qulakkeerumallugu piginnittussaatitaaneq pillugu inatsisissamik siunnersuuteqarput.

2: Imigassaq

Imigassaq inuiaqatigiinni oqallisaagajuppoq inuiaqatigiinnilu ajornartorsiutaangaatsiartoq takussaagajulluni. 2017-imi naalakkersuisuusimasut, tassa Siumut, Inuit Ataqatigiit Partii Nalerarlu imigassaq pillugu inatsimmik ilaatigut neqerooruteqartannginnissamik pisiniarfinnilu imigassamut assersuuteqarnissamik ilaqartoq akueraat. Inatsit siorna marsimi atuutilerpoq. Ukiarli ataatsimiinnermi sakkukillineqarpoq.

Naalakkersuisooqatigiit tapersersuisuisa Demokraatit imigassamut assersuinerup atorunnaarsinnissaa, neqerooruteqaqqusinnginnerup atorunnaarsinneqarnissaa inuusuttullu imigassallerfiusumi nalunaaqutaq 23-p tungaanut isersimasinnaanissaat kiisalu imigassallertarnermi piffissat sivitsorneqarnissaat pillugu aalajangiiffigisassatut siunnersuutaat akuersissutigineqarpoq.

AAMMA ATUARUK Alkohollov har ikke fået folk til at købe mindre

Imigassaq pillugu inatsimmi allannguutit taakku sisamat upernaakkut ataatsimiinnermi maanna akuerineqassapput.

Demokraatilli Nunatsinni imigassamut tunngasunik allanik aamma kissaateqarput. Partiip imiaaqqat aalakoornartortaqanngitsut maanna sineriatsinni tunisaasut puuinit allaanerusumik puullit eqqussorneqarsinnaalernissaat siunnersuutigaa. Aammattaaq immiaaqqat sodavandillu qillertuusamiittut tuniniarneqarsinnaalernissaat pillugu puiaasanik utertitseriaatsimik allannguinissamut siunnersuuteqarput.

Imerniartarfiillu sapaatip akunnerata naanerani nalliuttunilu pingasunut matusarunnaarlutik tallimanut matusalernissaat Demokraatit aamma siunnersuutigaat.

3: Ileqqorlunneq isertuanngissuserlu

Upernaami ataatsimiinnissamut siunnersuutit arfineq marluk isertuanngissusermut iloqqorlunnermullu tungasunik suliniuteqarnissamut tunngapput. Nunatsinni politikkimi qasseeriarluni mamianartuliortoqarpoq, inuiaqatigiillu qinigaat pisortat aningaasaataannik peqqissaarussinnginnertik pillugu utoqqatsertariaqarlutillu tatigineqarlutik atuuffitsik qimattariaqartarpaat. Kingullermik Siumumit, Doris Jakobsen Jensenip benziinamut kortimi atornerlunneqarsimanera pissutigalugu peqqinnissamut naalakkersuisutut atuuffini qimappaa.

AAMMA ATUARUK Doris J. Jensen Naalakkersuisunit tunuarpoq

Tamanna pissutigalugu Suleqatigiissitsisut Naalakkersuisut tamarmik akiliutaannut angalasarnerannullu takussutissat tamanut saqqummiunneqartalernissaat siunnersuutigaat. Demokraatit tassunga assingusumik aamma siunnersuuteqarput taakkulu siunnersuutaat Inatsisartunut taakkulu allaffissornerannut tunngalluni.

Aammattaaq peqquserluttoqartannginnissaanut inatsimmik misissuisoqarnissaanut pinerlunnikkullu aningaasarsianik malunnarunnaarsaasarnermik pinaveersaartitsisoqarnissaa siunnersuutigineqarpoq.

Taava whistleblowerit, tassa kinaassuseq isertorlugu suliffigisami assigisaaniluunniit eqqunngitsumik pisoqarneranik oqaatilliinissamut periarfissinissaq, pillugu aamma suliffeqarfini Namminersorlutik Oqartussat pigisaannisiulersuisut aningaasarsiaasa misissoruminarnerulernissaannik  siunnersuuteqarpo.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat