Ernini naammaginartumik ikiorserneqarniassammat Danmarkimut nuulersut
Milo Qvist Markussen ADHD-qarpoq pissusilersortarnermigullu ajornartorsiuteqarluni. Innarluutaalu immikkuullarimmat oqartussaniillu naammaginartumik ikiorserneqarsinnaanngimmat Milo angunnilu Johannes Nuummiiginnarusukkaluarlutik Danmarkimut nuunnissartik aalajangerpaat.
- Pissutsit assigiinngitsut aqqusaakkagut sakkortoqisut kommunimut oqartussanut sorsukkaluarluni iluamik ikiorserneqarsinnaanani, taamaattumik allatut ajornartumik ernitta perornissaa eqqarsaatigalugu aalajangersimavugut uanga Danmarkimut nooqatigisariaqarlugu, Johannes Qvist Markussen oqarpoq.
Milo ADHD-mik aamma hyperkinetisk adfærdsforstyrrelsemik innarluuteqartoq angajoqqaavi 2011-imi, Milo pingasunik ukioqartoq, paasitinneqarput.
AAMMA ATUARUK Ikiorneqarluarumalluta Danmarkimut nuuppugut
Milo tarnip pissusaanik ilisimasalimmit maanna malinnaavigineqarpoq. Sakkortuumillu pissusilersortarmat kommunip Milomut qanoq ikiuisinnaatiginera killeqalerpoq. Tapersersorteqarnissaami kisimi neqeroorutigisinnaavaat.
- Kommunip nalunaaruteqarneraninngaanniit aalajangernikuuvugut tassa nuuttariaqarpugut qanorluunniit, maaniiginnaraluaruni perorsinnaanngilaq iluamik, Johannes Qvist Markussen oqarpoq.
Paasissutissat:
Kommuneqarfik Sermersuummi meeqqanut ADHD-eqartunut ukuninnga neqerooruteqarput.
Meeqqat innarluuteqartut Kommuneqarfik Sermersuup meeqqeriviini tamani inissaqartinneqarput.
Taamatuttaaq meeqqat atuarfiini inissaqartinneqartarlutik.
Meeqqat ilaasa pisariaqartitsinerat aallaavigalugu immikkut atuartinneqartarput.
Atuartunulli nalinginnaasunut akuuleqqinnissaat siunertaasarpoq.
Atuartitsinerup nalaani meeqqat ilaat tapersersorteqartinneqartarput.
ADHD-qartunullu atuareernerup kingorna meeqqat arfinilinniit aqqaneq-marlunnut ukiulinnut ornittagaqarluni.
Immikkuullarissumik neqeroorfigineqartariaqartoq
Tassalu kommunimit ikiusinnaaneq killeqarpoq.
- Meeqqerivimmi akuulernissaanut sapinngisarput tamaat iliuuseqarnikuuvugut. Meeqqallu pitsaanerusumik ineriartornissaa anguneqassappat immikkuullarissumik neqeroorfigineqartariaqartoq, angajoqqaajusut paasitippagut, Kommuneqarfik Sermersuumi atuarfinnut meeqqeriveqarfinnullu pisortaq Jesper Madsen allappoq.
AAMMA ATUARUK Nunatsinni innarluutilinnut periarfissat naammanngitsut
Johannesip Danmarkimi Milomut ikiorsiissutaasinnaasut misissuiffigereerpai. Milollu siunissaanut neriuuteqarpoq.
- Danmarkimut pilluni meeqqat ataatsimoortillugit sammisassaqartillugit pilersaaruteqartarlutillu, siumut ingerlasut. Assut neriulluarnarpoq taamatut aalajangerneq, naak sakkortugaluaqisoq, Johannes Qvist Markussen oqarpoq.
Nunatsinni innarluutillit 132-it kommunimit akiliunneqarlutik Danmarkimut nuussimasut 2017-imi kisitsisit takutippaat. Qanorli amerlatigisut namminneerlutik Danmarkimut nuuttarnersut kisitsisaatigineqanngilaq.
