Nunatsinni innarluutilinnut periarfissat naammanngitsut

Inuttut pisinnaatitaaffiit pillugit instituti Naalagaaffiit Peqatigiit Innarluutillit pillugit ataatsimiititaliaata nalunaarusiaani taama allappoq.

- Innarluutillit amerlasuut Kalaallit Nunaanniit ilaatigut Danmarkimut nuunnissartik toqqartarpaat. Ikiorneqarnissaminnut ikorfartorneqarnissaminnullu periarfissaat nunagisaanni naammanngimmata nuuttarput, Inuttut pisinnaatitaaffiit pillugit institutimi fuldmægtigi, Mette Gaardsted Frandsen oqarpoq.

Naalagaaffiit Peqatigiit Innarluutillit pillugit isumaqatigiissutaat Danmarkip atsiorsimasaa naapertorlugu innarluutillit inuiaqatigiinnut akuunissaminnut aporfeqannginnissaat pisariaqartitaminnillu ikorfartorneqarnissaat naalagaaffiup akisussaaffigaa. 

Tamanna aamma nunatsinni atuuppoq, ajoraluartumilli innarluutillit ulluinnarni unammilligassarpassuaqartarput.

- Innarluuteqarnerup immikkoortutut taavalu inatsisitigut politikkikkullu pingaaruteqarujussuanngitsutut ingammillu isumaginnittoqarfiup ataaniittutut pineqartarnera Kalaallit Nunaanni ajornartorsiutaavoq malunnartoq, Mette Gaardsted Frandsen oqarpoq. Taassuma aamma uparuarpaa, susassaqarfinni arlalinni ataatsimoortumik suleqatigiittoqarpallaarneq ajortoq, innarluutillillu politikkeqarfinni allani, sullissinerni allani inatsisinilu allani sammineqarpallaarneq ajortut.))

Nalunaarusiami sammisat Kalaallit Nunaanni Inuit Pisinnaatitaaffii pillugit Siunnersuisooqatigiit, innarluutillit illersuisoqarfia, Tilioq nunatsinnilu innarluutilinnut peqatigiiffiit suleqatigalugit toqqarneqarput.

Isornartorsiuineq pillugu Isumaginninnermut Peqqissutsimullu naalakkersuisoq, Martha Abelsen KNR-imit oqaaseqartinniarlugu iluatsinngitsumik saaffigineqaraluarpoq.