Innarluutilimmut ataataq: Ikiorneqarluarumalluta Danmarkimut nuuppugut
Niels Storchip pania ineriartornermigut kingusissuuvoq. panimmillu ukiut 17-it matuma siorna Uummannammi sullinneqarnera naammaginagu Danmarkimut nuupput.
- Taamaattumik qanoq ineriartorneranut pitsannguutaassappat allatut ajornartumik Danmarkimut nuuttariaqaratta qanoq pitsanngoriartornera sullinneqarneranut ineriartorneranullu iluaqutaasussaassammat, Innarluutilimmut ataataasoq Niels Storch oqarpoq.
Naalagaaffiit Peqatigiit Innarluutillit pillugit ataatsimiititaliaata nunatsinni innarluutillit ikiorluarneqarumallutik Danmarkimut nuuttartut nalunaarusiaanni atuarneqarsinnaavoq.
Ataatsimiititaliap Naalagaaffiit Peqatigiinnut nalunaarusiartik ingerlateqqippaat,
Taakku nunatsinni najugaqarallaramik paniat atuareernerup kingorna meeqqanut innarluuteqanngitsunut ornittakkamukartarsimavoq, nipituallaamiissinnaannginnami qasuuilluni angerlartarsimalluni.
AAMMA ATUARUK Hjælp til grønlændere med handicap er ikke god nok
Paniat Danmarkimut nuunnerannit qaammatit marluk qaangiuttut innarluutilinnut atuarfimmi aallartippoq, pisariaqartitaalu naapertorlugit sullinneqalerluni.
- Taama ilillutalu siullerpaamik misigalugu panitta qanoq pitsaatigisumik sullinneqarnera. Aammalu innarluutillit allat peqatigalugit atuartitaanera assorujussuaq inuttut ataasiakkaatut ineriartorneranut iluaqutaasimavoq.
- Annertuumik innarluuteqarneq malunnaateqarluartumik piginnaasakillisimaneq
- Timikkut eqqarsartaatsikkulluunniit ataavartumik ajoquteqarneq amingaateqarneq.
- Ulluinnarni naliginnaasumik inuuneqarnissamut malunnaatilimmik killeqarneq.
Annertuumik innarluutillit kommunimit ikiorserneqarlutik Danmarkimut nuussimasut 132-usut 2017-imi februaarimi nalunaarsorneqarsimapput. Taakkulu saniatigut ilaqutariit pitsaanerusumik atugaqarumallutik Danmarkimut nammineerlutik nuussimasut nalunaarsorneqarsimanngillat.
Niels Storchip pania innarluutillit najugaqatigiiffianni maanna najugaqarpoq, ataataasup oqarnera naapertorlugu ineriartorluarluni. Tamaammat nunatsinnut utilersaanngillat
- Pissutigalugu panipput maani nammineq ineqarpoq, suliffeqarpoq, sullinneqarpoq aammalu ilani toqqissiivilluni ulloq naallugu peqataasarluni, Niels Storch oqarpoq.
