Doris J. Jensen Naalakkersuisunit tunuarpoq
Maanna Peqqinnissamut, isumaginninnermut inatsiseqarnermullu naalakkersuisuusimasoq naalakkersuisuunermini biilerisaanut, benzinamut akiuliutaanut tunngatillugu suliap kinguneratigut tunuarpoq.
- Inatsisinik unioqqutitsisimanngikkaluarlunga, nammineq piumassusera naapertorlugu pisussaq utaqqinagu uannut ilaquttannullu pisoq peqqinnanngimmat naalakkersuisutut tunuarniarlunga aalajangerpunga, Doris J. Jensen tusagassiortunik katersortitsinermi oqarpoq.
AAMMA ATUARUK Doris J. Jensen tusagassiortunik katersortitsivoq
Doris J. Jensenip inuup illoqatigisimasami maanna najugaqatigiunnaarsimasami qanoq ililluni benzinamut akiliut atornerlussimaneraa tusagassiortunik katersortitsinermini nassuiaatigaa.
Aammattaa suliaq imminut uiminullu pasillernermik kinguneqarsimasoq nassuiaatigaa. Tamannalu tunngavigalugu Naalakkersuisutut atuuffimminit tunuarpoq.
- Kukkunersiuinermik ataatsimiititaliap aalajangiinissaanut utaqqisinnaagaluarpunga, kisianni tamanna uannut ilaquttannullu peqqinnanngilaq, taamaammat aalajangerpunga.
Doris J. Jensen Inatsisartunut ilaasortaaqqilissaaq.
Tusagassiortunik katersortitsisoqareersorlu Naalakkersuisut siulittaasuat, Kim Kielsen pisoq pillugu oqaaseqarumanngilaq.
