Peqqissaasut pillugit malittarisassat nutaat Naalakkersuisunut isumaqatigiissutaanngillat
Nunatsinni Savalimmiuniluunniit ilinniarsimagaanni danskisut peqqissaasutut allagartaqalerniarneq qaammatinik pingasunik sivisussuseqarsinnaavoq.
2020-nngunngikkallarmat taamaassimanngilaq. Ingerlatseriaatsimimi siorna februaarimi allannguuteqartoqarpoq.
Naatsumik oqaatigalugu tamanna nunatta EU-mi ilaannginneranik pissuteqarpoq.
Nunatsinni Savalimmiuniluunniit ilinniarsimasut Danmarkimi allagartaqarnissamut piumasaqaat
Allagartartaarniaraanni ima iliortoqassaaq:
- Nunani avannarlerni, EU-mi nunani, Liechtensteinimi Schweizimiluuniit innuttaasuuneq
- peqqissaasutut Kalaallit Nunaanni Savalimmiuniluunniit ilinniarsimaneq
- Napparsimasut isumannaatsuunissaat pillugu aqutsisoqarfimmut kinaanermut uppernarsaammik, inuunermut uppernarsaammik, ilinniakkamit uppernaammik, sulinermi suliffeqarnermilu misilittakkanik nassiussineq
- qaammatini pingasuni suliamik isumaginnittoqarnissaanik naatsorsuuteqarneq
- Danskisut allagartaqaraanni toqqaannartumik kalaallisut allagartaqalertoqarsinnaavoq.
Naatsumik oqaatigalugu nunatsinni ilinniagaq ilinniakkatut EU-mi akuerineqanngitsutut isigineqartarpoq.
Taannalu Naalakkersuisunut isumaqatigiissuteqartoqannginnerani allannguutigineqartoq, peqqissutsimut naalakkersuisoq Kirsten Fencker (Naleraq) oqarpoq.
- Suleriaatsip allanngortinneqarnerani Naalakkersuisut ersarissumik isumaqatigiissuteqarfigineqanngillat, naalakkersuisoq allalluni akissuteqarpoq.
Rune Olsenip akuersissutinik tunniussisarnermi allannguuteqartoqarsimanera nalaappaa, taamammat akuersissumik pissarsinissaminut qaammatini pingasuni utaqqeqqaartariaqarsimavoq.
Rune Olsen 2019-imi ilinniakkaminik naammassivoq, taannalu nuliassanilu meeqqatillu marluk inuunermik nutaamik misiliiniarlutik Danmarkimut ukioq manna nuupput. Taannalu peqqissaasutut maajip qaammataani suliffissarsiorpoq.
Naalli peqqinnissaqarfimmi ukiuni marlunni sulereersimagaluarluni Danmarkimi peqqissaasutut taaguuteqarnissani qaammatini pingasuni unammillissutigisimallugu KNR-imut ippassaq oqaatigaa.
Taassuma malittarisassat siorna allanngortinneqarsimanerat ilisimasimanngilaa.
AAMMA ATUARUK Kalaaleq peqqissaasoq Danmarkimi akunnattooqqasoq
- Ikiorusunneqarnangalu arlaannut innersuunneqannginnama nammineerlunga inatsisinik arlalinnik EU-milu malittarisassanik misissuisariaqarpunga, Rune Olsen oqarpoq.
Danmarkimi napparsimasut isumannaatsuunissaat pillugu aqutsisoqarfiup Rune Olsenillu akornanni mailikkut allaqatigiinnerpassuit kinguneratigut suliaq aggustip naanerani naammassineqarpoq, Runelu peqqissaasutut sulisinnaalerluni allagartartaarpoq.
Suliaq politikkikkut maanna qisuariarfigineqarpoq.
Inuit Ataqatigiit Inatsisartunut ilaasortaatitaata, Sofia Geislerip peqqinnissamut naalakkersuisoq kalaallit peqqissaasutut ilinniarsimasut danskisut qanoq akuersissuteqarfigineqartarnissaannut allannguuteqartoqarnera pillugu apeqquteqarfigaa.
Peqqinnissamut naalakkersuisup, Kirsten Fenckerip (Naleraq) oqarnera naapertorlugu Naalakkersuisunut isumaqatigiissuteqartoqannginnerani allannguuteqartoqarsimavoq:
- Suleriaatsip allanngortinneqarnerani Naalakkersuisut ersarissumik isumaqatigiissuteqarfigineqanngillat. Taamaattumillu Peqqissutsimut Naalakkersuisoqarfik Kalaallit Nunaat aamma Danmark akornanni illugiimmik peqqissaasut akuersissummik periarfissaat qulaajaleruttorpaatm Kirsten Fencker Sofia Geislerimut akissummini allappoq.
KNR har bedt om et interview med Kirsten Fencker - men hun henviser blot til hendes svar til Sofia Geisler.
