Peqqinnissaqarfimmi qarasaasiatigut atortutigut ajornartorsiuteqarneq: Qarasaasiat 1800-nit amerlanerusut iluarsartuunneqassasut
![](/sites/default/files/styles/image_934x467/public/2024-07/Jesper%20Olesen%20Still.jpg?itok=F4U_XVxd)
Peqqinnissaqarfimmi sulisut pappilissanut ulluni kingullerni allattuisariaqareerlutik qarasaasiani atortut qitiusut maanna ingerlaqqilereerput.
- Qitiusumik systemigut soorlu napparsimasunik allattuiffigut, aaviisarfimmilu systemigut ingerlaqqilerput, nunap immikkoortuani Sermersuumi nakorsaaneq, Jesper Olesen oqarpoq.
- Sulinermulli qarasaasiat nalinginnaasumik ingerlalissagunik qarasaasialerisumit tamarmik immikkut suliarineqartariaqarnerat uatsinnut suli unammillernartuuvoq.
Peqqinnissaqarfiup qarasaasiaai nuna tamakkerlugu 1800-t pineqarput.
Dronning Ingridip Napparsimmavissuani Nuummilu peqqissaavimmi naammassisat arlaqarmata, peqqinnissaqarfiup annersaa nalinginnaasumik ingerlasoq, Jesper Olesen oqarpoq.
- Angerlarsimaffinni peqqissaasunut tunngasut illoqarfimmilu kigutileriffiit massakkut ilungersorfiupput.
Jesper Olesenip neriuutigaa, peqqinnissaqarfik sapaatip akunnerata tulliani ataasinngorpat nalinginnaangajattumik ingerlalerumaartoq.
- Suli suliassaqartussaassaaq, tunngaviatigulli suna tamaat sapaatip akunnera qaangiuppat ingerlasussaassaaq.
Peqqinnissaqarfik: sianerfigitigut
Nunatsinniinnaanngitsoq nunarsuamili tamalaani qarasaasiani atortutigut tallimanngormat ullaakkut ajornartorsiuteqalerput.
Nunarsuarmi qarasaasiani atortutigut ajornartorsiorneq qarasaasianut viruseqalitsaaliissummik CrowdStrikemik pitsanngorsaaniaraluarnermik pissuteqarpasippoq. Pitsanngorsaaniaraluarnerulli qarasaasiat Microsoftip attaveqaatiliaanik programmillit atorsinnaajunnarsippai.
Aamma inuit programinik atuisut eqqorneqarput, Australiamilu, Asiami, Europami USA-milu timmisartuussinissanut sunniuteqarluni.
Tassalu aamma nunatsinni peqqinnisaqarfik qarasaasianut viruseqalitsaaliissut taanna atugarigamiuk eqqugaavoq.
- Tamanna pissutigalugu nakorsiartorpaaluit ullumikkut sullinnissaat ajornakusoortissavarput. Tamanna nunatsinni tamarmi atuuppoq, nunap immikkoortuani Sermersuumi nakorsaaneq, Jesper Olesen tallimanngormat oqarpoq.
Nakorsiartussaagaluit sapaatip akunnerani matumani saaffiginnissasut tallimanngormat kaammattuutigineqarpoq.
Tamanna ullumi ataasinngornermi suli kaammattuutigaat.
- Sianerfigisaqarniarsaraagut, kisianni tamaasa angumerisinnaanngilagut, Jesper Olesen oqarpoq.
Nakorsiat kinguaattooqqasut qanoq amerlatiginersut oqaatigiuminaappoq.
- Nakorsiat qanoq amerlatigisut kinguaattoorfiginerlugit suli naluarput, ullorsiutigut aatsaat maanna ammarsinnaaleratsigit soqarnersoq takusinnaaleqqammerparput, Jesper Olesen oqarpoq.