Illorsuit: Peqatigiiffiup siulittaasua tunuarpoq, sorsuutigut suli ingerlapput

Pisoq alianartoq ulloq 17. Juni 2017 tamatta eqqaamasarput, Karrat kangerluanni ujaqqat naakkaanerisa kingunerani tassaarsuaqarmat. Nuugaatsiaq Illorsuillu tassaarsuarmik eqqugaapput.

Inuit sisamat Nuugaatsiami ajunaarput. Illorsuarmi meterit pingasut imarmik ulippoq nunaqarfillu inuerutsinneqarpoq. 

Kingorna Illorsuarmiut nunaqarfimminnut uterusullutik ilungersuuteqartut peqatigiiffimmik 2019-mi pilersitsipput.

Peqatigiiffik Illorsuilli siulittaasua Dorthe Qvist Jerimiassen tunuarniarluni maanna aalajangermat,peqatigiiffik ingerlajunnaarallarluni. Angerlaqqinnissamulli suliniut suli ilungersuutiginiarlugu oqarpoq. 

Dorthe Qvist Jerimiassenip Nuummi ilinniartunngortussaalluni oqaatigaa, tikikkunilu peqatigiiffiup oqaaseqartartua politikerijusimasoq Lars-Emil Johansen suli suliassarpassuusut oqaluuseriniarlugit naapinniarpaa. 

Siulittaasuulluni ilungersuutai

Peqatigiiffiup siulersuisuilu Illorsuarmut angerlaqqinnissartik ukiut tallimat ilungersuutigaat. Suliarlu oqimaassimasoq Dorthe Qvist Jerimiassenip oqaatigaa.

- Imminut pilliutigingaatsiartarnikuugama, imminut eqqaarsaatigilaarusullunga una tunuartikkallarakku taava tunualeriarama allanik ingerlatserusussinnaasunut tunuarsimaarfigineqalaarami. Paasinarluni aamma uangalu aamma nammineq soqutigisakka taavalu aamma ingerlariaqqikkusullunga, ilinniaqqikkusullunga, tamakkua assigiinngitsut peqqutaallutik uanga aamma tunuartariaqalererniit peqqutaaqataavoq aamma uninneranut. 

Assi © : Erik Qvist

Dorthe Qvist Jerimiassen Illorsuarmiut pisortani upalungaarsimasunit sulialinnit immikkortitaanikuusut misigisimagami arlaleriarluni tusagassiutiniittarpoq. Allammi nunaqarfiit najugallit nunaqarfimminni najugaqarusunnerlutik qinigassinneqarput. Illorsuarmiut taama qinigassinneqanngillat. 

Peqatigiiffiup siornatigut aamma tikkuarnikuua inuit pisinnaatitaaffiinik unioqqutitsisoqarnikuusoq. 

- Taava aamma ammaqqinnissaanut nukippassuit assut atornikuullutigit misigissitsitigut assigiinngitsunik nassaqatartuaannarami una suliaq oqimaattorujuunikuuvoq paaralugu. Uanga nammineq misigisakka aallaavigissagukkit taavalu una aamma pisoq taamatut qimagussorneqarnerup kingorna suliaq paaralugu imaannaanngittorsuuvoq. Dorthe Qvist Jerimiassen oqarpoq. 

Dorthe Qvist Jerimiassenip tapersersorneqartarnikuusimanertik inussiarnisaarfigitittarsimanertik qujamasuutigaa.

- Pilersitsinitsinni aamma naalakkersuisut ornittarnerini angalasarnitsinni saqqummiussiartortarnitsinni ajattorneqarata tikilluaqquneqartuarsimanerput tamakku tamarmik qujamasuutissaapput uagutsinnut ingammik uummateqarfigalugu suliaq suliaqarfigisimallugu kingumut eqqaasaqarnartorujuuvoq qujamasunnarlunilu taamatut suliaqarnitsinni, suleqatigisimasarpassuagut, politikki, kommune iluanilu, tamarmik, aalisartorpassuit, uummannap eqqaani, qujamasuutissalerujussuuvugut pilerisnnikuuneranut suleqatigisimasarpassuatsinnut assigiinngitsorpassuartigut aamma ilinniarfiuvoq, tamakkua peqatigisarnikuuneri suleqatigisarnikuunerilu.

Lars-Emil Johansen: suliat ingerlaqqissapput

Dorthe Qvist Jerimiassenip peqatigiiffimmi siulittaasuunera Lars-Emil Johansenip iluarisimavaa. 

-Peqatigiiffik matuilinngilaq.

- Dorthe Qvist Jerimiassen ilinniaqqilerneq peqqutaalluni siulittaasutut unittariaqarsimavoq, isumaqatigiippugut Dorthe tikeriarpat suleqatigiissalluta taavalu siulersuisunutt ilaasortat perusuttut attaveqarfigisarlugit. Peqatigiiffiup oqaaseqartartua Lars-Emil oqarpoq. 

Tassalu Illorsuarmiut angerlaqqinnissaannut nunaqarfiullu ammaqqinnissaanut suliaq uninngilaq.

Upalungaarsimanermut ataatsimiititaliarsuaq politiillu naalagaapput

Peqatigiiffiup siulittaasuatut sulinera sakkortugaluartoq, suliai pingaaruteqarsimapput.

- Qujanartumik immaqa aamma nipiliuutigineqartarnerata kingornatigut aamma soorlu ilaa upalungaarsimanermut atortukujunnik  ilioraasoqarpoq assigiinngitsutigut iluaqutitaqarpasippoq uagut nipilioqataanitsinni tassami isumannaallisaaneq eqqarsaatigalugu aaqqissuussisoqallattaalernikuulluni tassunga soorlu qaammatit tamaasa nalunaarsusoqartalernikuuvoq qanoq inissisimaneranik taajassuma eqqaani qaqqat, taamaammat iluaqutitalerujuuvoq aamma peqatigiiffiup pilersinneqarnikuunera nipituuliortarsimanerpullu inuppassuulluta.

Politikkikkut aamma susoqalaarpoq. Kingullermik Naleqqamiit Jens Napaattoq ukioq manna  aprilimi paragraf 37 atorlugu apeqquteqaateqarpoq. Naalakkersuisut  Illorsuarmiut inoqarfimminnut qaqugu uteqqissinnaanissartik naatsorsuutigineraat apeqquteqaatigaa.

Tassani Nunalerinermut, lmminut Pilersornermut, Nukissiutinut Avatangiisinullu Naalakkersuisoq Kalistat Lund, suliami akisussaasoq ima akissuteqarpoq:

- Naalakkersuisut Upalunaarsimanermut ataatsimiititaliarsuup Politiillu innersuussutaat malippaat. Upalungaarsimanermut ataatsimiititaliarsuup kiisalu Politiit nalilersuinerat allanngussappat, soorunami Naalakkersuisut Illorsuarmiut Illorsuarmut uteqqissinnaanissaat aalajangiiffigissavaat