Illorsuarmiut naalakkersuisoq naammagittaalliutigigaat: Immikkoorsitsineruvoq
Illorsuarmiut nunaqarfimminnut uteqqikkusussappata tamanna inerteqqutaanngitsoq, pisortalli suliffeqarfiutaat ingerlanneqalernavianngitsut, Avatangiisinut naalakkersuisoq Kalistat Lund oqarpoq.
Tassa imermik, kiassarnermik imaluunniit tunisassiorfimmik pisortanit ingerlatsisoqarnavianngilaq.
Tamanna Dorthe Qvist Jeremiassenip naammaginngilaa.
Illorsuarmiut peqatigiiffianni siulersuisuuvoq.
- Taanna oqariartuutigineqartoq tupaallaatigivallaanngilara, siulianili tusartareernikuugatsigu. Kisianni assorujussuaq eqqarsaameqqavunga ulluni makkunani, taanna oqarpoq.
- Apeqquterpassuarnik akineqarsinnaanngitsunik eqqarsaateqaqattaarpunga, soorlu taamaattoqarsinnaava naalakkersuisut taamannak assigiinngisititsillutik sullissisinnaappat innuttaasunut?, Dorthe Kvist Jeremiassen oqarpoq.
AAMMA ATUARUK Kristian Illorsuarnit nuutsitaanikuuvoq - taassumalu nunaqarfini suli angerlarserfigaa
Nunaqarfimmut uternissaq kissaatiginersaavaa.
Illorsuarni 2017-mili tassaarsuartoqareersoq najugaqartoqanngilaq. Tamaanngalu uteqqissagaanni navianaateqartorujussuusinnaalluni.
Karranimi qaqqaq sisoorujussuassagaluarpat tassaarsuartoqarnerani najugaqarfik tamakkerlugu mallinik ujarassiuut naatsorsuinerat naapertorlugu qarsutsissaaq. Taamaattumillu nunaqarfimmi suliffinnik pisortanit ingerlatsinissaq navianarpallaartoq nalilerneqarpoq.
Taamaakkaluartoq immikkoorsitsinerusoq Dorthe Qvist Jeremiassen isumaqarpoq.
Qaarsumi Niaqornanilu nukissiorfik pisiniarfillu ammatinneqassapput, uffa qaqqaq sisuussagaluarpat tassaarsuartitsillunilu eqqugaaratarsinnaasuni ilaasut.
- Tamatta assigiimmik pineqartariaqarpugut. Assigiinngisitsillutik sullissisussaanngillat naalakkersuisut. Ilai aaqqissuussivineqartut - uagullu taamatut aaqqissuussivigiumanata - taakkualu aaqqissuusivigineqarlutik. Taava sooruna Illorsuarni taamaattoqarsinnaanngila? Dorthe Qvist Jeremiassen aperaaq.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.
