Kristian Illorsuarnit nuutsitaanikuuvoq - taassumalu nunaqarfini suli angerlarserfigaa
73-inik ukiulik, Kristian Nielsen, Illorsuarmioq, 2017-imi tassaarsuaqareernerata kingorna aalisartutut piniartutullu inuussutissarsiutini unitsissimavai.
Uummannami nulianilu illussaminnik Namminersorlutik Oqartussanit tunineqarput. Illorsuit tungaannut isikkiveqartumi. Taannalu qimerloortuartarpaa.
- Taavunga isigileraangaama eqqarsaatit assigiinngitsorpassuusarput. Inuusuttuaraaninniit misigisakka taavani nuannersorpassuit. Alianaasseruttorluni taavunga qillariinnanngoraagami eqqarsaaterpassuusarput, Kristian Nielsen KNR-imut oqarpoq.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Karrat Kangerluanni qaqqat nakkaaratarsinnaasut Naalakkersuisunit sapaatit akunnerata siuliani paasissutissiissutigineqarput.
Usoruttoq
Qaarsut Niaqornallu eqqugaanerpaasussatut ilimagineqarlutik. Naalakkersuisut aalajangerput pinngitsaaliissummik nuutitsinatik, sumi najugaqarusuttut namminneq aalajangiiumaartut.
Kristian Nielsenip Illorsuit tungaanut isikkivik alakkartuartarpaa.
- Taamani tusarakku usoruallakkama. Usornaqaat inuit piginnaatitaaffiinik tunineqaramik. Uagulli pinginnaatitaaffimmik tunineqanngilagut. Pinngitaalilluta pinngittaalivilluta eqisimaarluta timmisartumut ikiartortippaatigut, oqaluunneqaratalu sumunnaanniaraatigut. Assut paatsuuganaq, suniartugununa, assorujussuaq ajorpoq. Ajortorujorujussuuvoq taamannak pineqarlui, Kristian Nielsen oqarpoq.
Innuttaasut ima amerlatigisut nuunnissaminnut periarfissinneqassapput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Karrat Kangerluanni qaqqap sisooratarsinnaanissaanut misissuinerit kingulliit malillugit, ajornerpaamik pisoqaraluarpat Illorsuarni 19 meterinit 43 meterinut portutigisoq angullugu malinnit anguneqarsinnaavoq.
Aasarsiorfigisaraat
Nuliani ilaquttanilu peqatigalugit Illorsuit aasap ulluini siornaak siornalu najortuartarpaat. Umiatsiaat sissap killinganiittuartartoq, tassaamininnguamik malimmilluunniit takusaqarneq ajorlutik oqaluttuarpoq.
- Massakkunaasiit tassa pilerisuttorsuuvugut inuiattut ullorsioriartornissamut, inuiattut ullorsiortarpugut ukiut tamaasa taakani.
Sumi najugaqarnissamik nammineq aalajangiisinnaasuuguni Illorsuarniinnissani qularutiginngikkaluarpaa.
- Illorsuit siumut aallarluaruttortut aallarpugut. Tunisassiorfissaa nutarterluni nutaavissuanngorluni piariilersoq, nakorsiartarfissarsuaq nutaarsuaq piareertoq.
Taanna nuutsitaanermik kingorna Aasianneeqqaarsinnarluni Ilulissiartinneqarpoq kingornalu Uummannamut nunassilluni.
Illorsuarni qimmii 17-it oqartussanit tassaarsuaqareernerani nakkutigineqarput. Uummannamulli tikikkami qimmini sanigorsimavallaaqimmata ingerlaannaq tamaasa toqorartippai kingornalu qimmilinani.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.