Peqatigiiffik nutaaq aallarnisaasunut aningaasaliisussarsiussaaq
Suleqatigiinnut nutaanut marlunngornermi ualikkut ataatsimeersuartoqarpoq.
Suleqatigiit taakku Iliup siunnersortit pisortaata Maren Granlienip pilersippai.
- Tassa imaappoq, attaveqaatit inuit suliffiup avataaniittut kalaallinut aallarnisaarusuttunut aningaasaliinermik kissaateqartut illoqarfimmilu suliffeqarfinnik amerlanerulersitsinissamut ikiuuttussat, Ilimmi siunnersortit pisortaat Maren Granlien attaveqaatinik aallarniisoq KNR-imut oqarpoq.
Business Angels Network Greenland nunami suliffeqarfinnut piujuartitsisumik aningaasaliinissamut isumassarsititsissaaq aallartisaallunilu.
Taamak siunnersuisarfik Ilik tusagassiuutinut nalunaarummi allappoq.
Attaveqaat atlantikup avannarpasissuaneersup North Atlantic Business Angels Networkip ilagaa, nunanilu Norgemi, Sverigemi, Finlandimi, Danmarkimi Savalimmiunilu aamma peqarpoq.
- North Atlantic Business Angels Network nunap ilaani mikinerusuni taakkunani suliffeqarfiusinnaasunik pilersitsinissamut suleqatigiinneq isumassarsianillu avitseqatigiinnissaq pillugu suliniuteqartuuvoq. Taakkualu Kalaallit Nunaat pisariaqartippaat, Maren Granlien KNR-imut oqarpoq.
Peqatigiiffik pisortatigoortumik marlunngormat ataatsimeersuartoqareernerani pilersinneqarpoq, suleqatigiillu pilersinneqarlutik.
Tassani Nanna Lumholdt-Vangkilde, Finn Meinel, Augusta Lundblad aamma Iliup siunnersortit pisortaa Maren Granlien ilaasortaapput.
Peqatigiiffik nuna tamakkerlugu saqqummiunneqarnissaa suliniutaassaaq, peqatigiiffiup ilaajoratarsinnaasumik, aningaasaliisinnaasussanik aallarnisaasunullu pilerinarsaassalluni.
Business Angels qanoq ingerlariuseqarnernik aningaasaliisinnaasussanut aamma pikkorissaassapput.
- Tassani Kalaallit Nunaat BANG aqqutigalugu, aallarnisaasunik kalaallinik marlunnik sassartitsinissaannut, kalaallinik business angelsimut kisianni aamma business angelsit Islandimeersut, Savalimmiuneersut Norgep avannaaneersullu suliniummik saqqummiiffiginissaannut periarfissinneqarput, Maren Granlien KNR-imut oqaluttuarpoq.
Piginnaasanik ineriartortitsineq aamma aningaasaliineruvoq
Attaveqaammi uani aningaasaliineq kisimi paassissutaassanngilaq, Maren Granlien KNR-imut oqaluttuarpoq.
Piginnaasat aamma aningaasaliisut tapersiutigisinnaavaat.
- Piginnaasat suliffeqarfiup ingerlariaqqinnissaanut ikiuutaasinnaapput. Tassa aallarnisaasut artorsartut, ingerlariaqqinnissaminnut aningaasanik, kisianni immaqa aamma attaveqaatinit siunnersorneqarlutillu piginnaasanik assigiinngitsunik pisariaqartitsisut, Maren Granlien KNR-imut oqarpoq.
Suliffeqarfiit attaveqaammut ilaarusuttut piginnaasanik ineriartortitsinissamut periarfissinneqassapput, Maren Granlien oqarpoq.
Suliffeqarfiit ineriartortut
Suliffeqarfittut killiffimmi ineriartortitserusunneq pingaarnertut ajornartorsiutaavoq.
Aningaaserivimmiilli aningaasanik taarsigassarsiniarneq ajornaatsuinnaaneq ajorpoq, Maren Granlien oqaluttuarpoq.
- Ilaanneqartarpoq aningaasaatinik taarsigassarsiniarsinnaasoqarneq ajorluni, aningaasaatinik aarlerinartumiittunik pisariaqartitsineruneq pissutaalluni. Tassaniuvoq business angels aningaasanik taarsigassarsititsisinnaasoq, taanna oqarpoq nangillunilu:
- Tassa aallartisaanermi nammineq aningaasaatit nungunnerini, suliffeqarfiullu ineriartornissaanut avataaniit pisariaqartitsinermi saaffiginninnissaq, Maren Granlien oqarpoq.
