Sydneymi aallaasersortoqarnerani pinerluttoq ikilik Australiamiusut innuttaassuseqartoq
Sydneymi aallaasersortoqarnerani pinerluttut marluusut aappaa angut 24-nik ukiulik kinaassusersineqarpoq, taanna Australiamiutut innuttaassuseqarpoq. Australiami inunngorpoq.
Nutaarsiassaqartitsivik Reuters naapertorlugu, Australiami nunami namminermi ministeri Tony Burke oqaluttuarpoq.
Aallaasersortoqarnerani pinerluttup 24-nik ukiullip angutaa – angut 50-inik ukiulik – aamma pinerleqataasutut kinaassusersineqarpoq. Ilinniarnissamut visummeqarluni 1998-imi Australiamukarpoq, kingornalu najugaqartuarnissaminut akuerisaalluni.
Angut 50-inik ukiulik Australiap illoqarfissuani Bondi Beachimi ippassaq sapaammi aallaasersortoqarnerani toquvoq. Allat 15-it toqutaapput, taakku ilaanniilluni niviarsiaraq qulinik ukiulik.
Juutit sissami nalliuttorsiornerannut saassussineruvoq, pinerluttorlu 24-nik ukiulik ikilerneqarpoq, inuunerminillu navianartorsiortutut perulunngitsutulli oqaatigineqarpoq. Taanna napparsimmavissuarmi politiinit illersugaalluni uninngasoq, nutaarsiassaqartitsivik AFP allappoq.
Saassussinermi suna pissutaanersoq ilisimaneqanngilaq. ABC naapertorlugu, Bondi Beachimi pinerluttut biilerigunagaanni Islamisk Statip erfalasuinik marlunnik nassaartoqarpoq.
Aatsaat taamak ukiuni 30-ni toqoraasoqartigisoq
Australiamiut nutaarsiassaqartitsiviat naapertorlugu, pinerluttoq 24-nik ukiulik Islamisk statip Sydneymi baseqarfiannut atassuteqaratarsinnaaneranut Australiap isumannaallisaanermi kiffartuussisuisa ukiut arfinillit matuma siorna misissuiffigaat.
Nutaarsiassaqartitsivik naapertorlugu, angut taanna 24-nik ukiulik, Islamisk statimi ilaasortamut 2019-imi tigusarineqartumut Australiamilu peqqarniisaarniarnermik piareersaasimasutut eqqartuunneqartumut qanimut attaveqartuuvoq.
Australiami politiit isumannaallisaanermiluunniit kiffartuussisut suliamut tunngatillugu oqaaseqaateqarusunngillat, nutaarsiassaqartitsivik AFP allappoq.
ABC naapertorlugu, piluttut aappaat politiinit ilisimaneqartoq, siooranarsinnaasutulli nalilerneqanngitsoq, isumannaallisaanermi kiffartuussisut pisortaat Mike Burgess oqarpoq.
Angut 24-nik ukiulik ukiup affaa misissoqqissaarneqartoq, Australiap ministeriunera Anthony Albanese ataasinngornermi tusagassiortunut sassarnermini oqarpoq.
Sydneymi sapaammi aallaasersortoqarnera Australiami ukiuni 30-ngajanni aatsaat taama toqussutaasoqartigivoq. Tasmanienimi inuit 35-t 1996-imi toqutaapput. Tamatuma kinguninngua Australiami sakkut pillugit inatsimmik malunnaatilimmik sukaterisoqarpoq.
/ritzau/
