Naqqiissut: Ilanngutassiami qulequtaaqqap siulliup kingorna KNR-imit naqqiissuteqarfigineqarpoq, saqqummersitami siullermi Naleraq oqallitsitsilersutut oqaatigineqarnera pissutigalugu. Tamanna kukkuneruvoq. Naleraq aperineqarami akissuteqarpoq. 

Kalaallit Nunaata Ruslandimik oqaloqateqarnissaa nunanut allanut ilisimatusarnermullu naalakkersuisup Vivian Motzfeldtip(S) aallartikkusunngilaa.

KNR-imit apersorneqarluni taama oqarpoq, Ruslandimi nunat tamalaat inatsisaannik unioqqutitsillunilu inuttut pisinnaatitaaffinnik unioqqutitsilluni, taanna oqarpoq.

- Sorsuttoqannginnissaa pingaartillugu nunanut allanut politikkeraarput, eqqissisimasumillu aaqqiisoqartarnissaa kissaatigalutigu, Vivian Motzfeldt KNR-imut oqarpoq, nangillunilu:

- Takorloorsinnaanngilara nunamik sorsuttumik, inuppassuillu inuunerannik naleqarsimasumik qanillattussallunga, taanna oqarpoq.

Brobergip matu ammarusuppaa - Motzfeldtili naaggaarpoq

Naleqqap siulittaasua Pele Broberg KNr-imit oktobarini apersorneqarpoq.

Ilulissani mittarfittaassaq atulerpat Issittumi Siunnersuisoqatigiit ilaasortatik illoqarfimmut Ilulissaniit isumaqatigiissut uppernarsarteqqikkiartorlugu aggersarsinnaanngussavaat, Pele Broberg oqaluttuarpoq.

Issittumi Siunnersuisoqatigiinni ilaasortani Ruslandi nunatsinni 2025-mi sakkutooqarnerulernermut maanna patsisitut ilaavoq.

- Ajornartorsiuteqarfigisatit oqaloqatiginngikkukkit, qanoq ilillutit ajornartorsiutitit aaqqissinnaassavigit? Pele Broberg aperivoq.

Ruslandip siooranartuunera tunngavilersuutigalugu danskit kalaallillu sakkussiornerat politikkikkut kukkunerunerusoq, Pele Broberg isumaqarpoq:

- Sakkussiornerulerpata sakkussiornerulernissarput akerleriinnermik kinguneqartitsisussaavoq. Tassa uagut naalakkersuisullu pisunut isiginneriaasitta assigiinngissutaat. Taakku sakkortunerulersitsiniartarput uagulli akerlianik piniarpugut, Naleqqami siulittaasoq Pele Broberg oqarpoq.

Vivian Motzfeldtili tassa matumani isumaqataanngilaq.

- Nuna sanilerisarput aammalu Issittumeeqatigisarput sorsunnermik aallartitsisimanngitsuuppat ullumikkut killiffigisarput allarujussuarmiissagaluarpoq, qaqugumorsuarluunniit Issittup sakkulersuuffiunnginnera sussaannginneranik attassineq, nunat atsioqatigiissimasut, tassunga ilumoorfiginninnerat aamma allatut inissisimasussaassagaluarpoq. Kisianni soorunami suut tamarmik allanngorput nuna tassunga atsioqataasimasoq sorsuunnermik aallartitsimmat, Vivian Motzfeldt KNR-imut oqarpoq.

Issittumi suleqatigiinneq unitsinneqarallartoq

Kalaallit Nunaat Issittumi Siunnersuisoqatigiinni ukioq manna maajimi siulittaasuulerpoq, Kalaallit Nunaat, Savalimmiut Danmarkilu sinnerlugit 2027-p tungaanut siulittaasuussalluni.

Siunnersuisoqatigiillu siulittaasoqarfiata oqaluttuarisaanerani nunap inoqqaavineersut naalakkersuisunik akisussaaffimmik akisussaaqataasumit oqartussaasoqalissaaq. 

Ruslandili Ukrainemik saassussilermat Siunnersuisoqatigiinni sulineq allanngorluinnarpoq, Vladimir Putinillu tigusarineqarnissaa nunat tamalaat eqqartuussiviannit piumasarineqalerluni.

Ruslandip Issittumi Siunnersuisoqatigiinnut aningaasaleeqataasarnini maannakkut uninngatippaa, Ruslandilu peqataaffiginngisaanik Siunnersuisoqatigiinni sulinerup unitsikkallarneqarnissaa nunat Issittumut sineriallit arfineq-marluk 2022-mi marsimi aalajangerlugu.

Ministerit atorfilittallu nuimasut taamanikkulli ataatsimiittarunnaarput, Siunnersuisoqatigiinni suliat taamaallaat amerlanngitsut nanginneqarlutik.

Ruslandilli suleqatigineqaqqilernissaanut periarfissaqalissasoq, soorlu siornatigut suleqatigiittoqartoq, naalakkersuisup neriuutigaa:

- Neriuppunga siunissami tassunga killittoqaqqikkumaartoq. Issittormioqatigiit imminnut pisariaqartipput suleqatigiinnerillu pitsaasut tamatumani pisarsimallutik, taanna KNR-imut oqarpoq.

Rusland nunallu Issittumut sineriallit allat Ilulissani isumaqatigiissut tunuliaqutaralugu Kalaallit Nunaannut qaaqquneqarnissaat Pele Brobergip oktobarimi siunnersuutigaa, Ilulissani isumaqatigiissut uppernarsarneqaqqissinnaaniassammat:

Rusland nunallu Issittumut sineriallit allat Ilulissani isumaqatigiissut tunuliaqutaralugu Kalaallit Nunaannut qaaqquneqarnissaat Pele Brobergip oktobarimi siunnersuutigaa, Ilulissani isumaqatigiissut uppernarsarneqaqqissinnaaniassammat:

- Mittarfik atulerpat Ilulissaniit isumaqatigiissut uppernarsarneqaqqinneqartariaqarpoq, tassanilu issittumi eqqaamiugut pingaaruteqarput, Pele Broberg oqarpoq.

Ruslandilli Ukrainemik saassussinini attatiinnarpagu tamanna periarfissaanngitsoq Vivian Motzfeldtip tassa erseqqissaatigaa. Qanorluunniit pisoqaraluarpat tunngaviusumik pingaartitagut attatiinnassavagut, nunallu pingaartitanik tamakkuninnga ataqqinnittut suleqatigissallugit:

- Taamatut oqarusuppunga. Taamaattorli naleqartitat eqqarsaatigissagaanni nunamik sorsunnermik qaqugukkulluunniit, ungalassimatitserusuttumik sorsussimanngisaannartumillu, takorloorsinnaanngilara nunamik sorsuttumik, inuppassuillu inuunerannik naleqarsimasumik qanillattussallunga, Vivian Motzfeldt oqarpoq.