Peqatigiiffik: Meeqqanik allamut inissiinissamut suliani assigiinngitsisisoqartarsimanera uppernarsarneqassasoq naatsorsuutigaarput
Peqatigiiffik Mentor Immanuel marlunngorneq maajip 24-anngornissaanut erinisuppoq. Peqatigiiffik taanna Danmarkimi ilaqutariinnik kalaallinik isumaginninnermi sullitanik siunnersuisarpoq.
Danmarkimimi atugarissaarneq pillugu ilisimatusarfiup, VIVE-p, Danmarkimi kommunit ilaasa ilaqutariinnik kalaallinik meeqqamik allamik inissiinissamut suliani qanoq sullisseriaaseqarnerannik kalaallillu meerartaasa oqaasiisa kulturiatalu suliani qanoq aallaavigineqartartiginerannik misissuinermit nalunaarusiaa ulloq taanna saqqummissaaq.
Mentor Immanuelimiillu kajumissutsimik suleqataasoq, Najaanguaq Dalgård Christensen, nalunaarusiap saqqummernissaanut isumalluarpoq.
- Neriuppugut kalaallit angajoqqaat oqarnerat naapertorlugu assigiinngisitsineq meeqqamik allamut inissiinissamut suliani pisartoq VIVE-p nalunaarusiaani uppernarsarneqarsimassasoq, taanna KNR-imut oqarpoq.
Mentor Immanuel VIVE-p Danmarkimilu kalaallit angajoqqaat allamut inissinneqarsimasumik qitornallit atassuteqaqatigiinnissaannut ikiuullunilu nalunaarusiornermi tusarniaavigineqartarpoq.
Kulturikkut assigiinngissuteqarneq paatsoornermik kinguneqartartoq
Danskit isumaginninnermut nunamullu namminermut ministereqarfiannit 2021-mi decembarimi kisitsisit naapertorlugit, Danmarkimi kalaallit meerartaasa 7 procentii danskillu meerartaasa 1 procentii allamut inissinneqarsimapput.
Amerlassutsimikkut nikinganerujussuat Najannguaq Dalgård Christensenip oqarnera naapertorlugu ilaatigut kalaallit angajoqqaat danskisoorpiarsinnaannginnerannik, oqalutsissaaleqisarnerannik, innuttaasutut qanoq pisinnaatitaaffeqarnerminnik ilisimasakinnerannik taavalu danskit isumaginnittut kalaallit kulturiannik paasisimasakinnerannik peqquteqarpoq.
Danskit isumaginninnermut nunamullu namminermut ministereqarfiannit 2021-mi decembarimi kisitsisit naapertorlugit, Danmarkimi kalaallit meerartaasa 7 procentii allamut inissinneqarsimapput.
Danskillu meerartaasa 1 procentii allamut inissinneqarsimapput.
Danmarkimi atugarissaarneq pillugu ilisimatusarfiup, VIVE-p, Danmarkimi kalaallit meerartaannik allamut inissiisarnernik misissuineq pillugu nalunaarusiaa maajip 24-anni saqqummissaaq.
- Kommunini isumaginnittut kalaallinut paasinninnikinnerat taavalu kalaallit tunuliaqutaannik, kulturiannik, ileqquinik naleqartitaannillu paasisimasakinnerat paatsooqatigiinnerpassuarnut peqqutaasarput.
- Kalaallit angajoqqaat pissusaat taakkua uparuakkajuppaat, taanna oqarpoq.
Tamanna meeqqanik pisariaqanngitsumik allamut inissiisoqartarneranik kinguneqartarpoq, Najannguaq Dalgård Christensen oqarpoq.
AAMMA ATUARUK Nalunaarusiaq: Meeqqat angerlarsimaffiup avataanut inissinneqarsimasut inersimasunngoraangamik angerlarsimaffeqanngitsuusartut
Mentor Immanuelip ilaatigut danskit tarnip pissusiinik ilisimasallit meeqqamik allamut inissiinissamik naliliinissamut tunngatillugu kalaallinik angajoqqaanik danskillu ileqqui tunngavigalugit danskisut apersuisarnerat isornartorsiorpaa.
Nalunaarusiaq Danmarkimi isumaginninnerup aaqqissuussaanerata arlalitsigut allanngortinneqarneranik kinguneqarumaartoq, Najannguaq Dalgård Christensenip neriuutigaa.
- Nalunaarusiarlu kalaallit Danmarkimi inatsisitigut isumannaassuseqarnerulernissaannut aamma iluaqutaajumaartoq neriuutigeqaarput. Taamaammat Danmarkimi kalaallit ikinnerussuteqartutut illersugaanissaat aamma sulissutigaarput, Najannguaq Dalgård Christensen oqarpoq.
Danmarkimimi kalaallinik isumaginneriaaseq, tamatumani kalaallinik meeqqanik allamut inissiisarneq, DR-ip sapaatit akunnerini kingullerni sammingaatsiarpai. Ilaatigut angajoqqaat tarnip pissusiinik ilisimasalinnit suliani danskisut apersorneqartarnerat Mentor Immanuelimit isornartorsiorneqarpoq.
