Assi: KNR

Partiip inuusuttai: Kinguaassagut Krusep eqqarsaatiginngilai

Saarullittassat pisarineqarsinnaasut marloriaatinngortinneqarneri pillugit, Aalisarnermut Naalakkersuisoq, Karl-Kristian Kruse, biologit innersuussutaannik malinngitsutut Demokraatit Inuusuttaannit isornartorsiorneqarpoq aamma namminneq parteertik taamatut isornartorsiorlugu.

Kalaallit Nunaata siunissaa Karl-Kristian Krusep ulorianartorsiortikkaa, Demokraatit Inuusuttaat taama isumaqarput.

Taakku taama isornartorsiuinerminnut tunngavigaat, kitaani saarullittassat biologit inassutigisaanniit marloriaammik, Aalisarnermut Naalakkersuisoq pisassiimmat.

Aamma atuaruk Steen Lynge: Saarullittassanik qaffaaneq siunissami ajornartorsiutinik annertunernik pilersitsiinnassaaq

Aalisarnermullu Naalakkersuisup taamaaliornermini naalakkersuisooqatigiinnermut isumaqatigiissutitut atsiorneqarsimasoq ataqqinngikkaa, tusagassiuutinut nalunaarumminni allallutik.

- Aalisarneq Nunatsinni inuussutissarsiutit pingaarnersaraat taamatullu aningaasanik isaatitsineq eqqarsaatigalugu tamanna pingaaruteqarluarluni. Naalakkersuisooqatigiinneq pillugu atsioqatigiinnermi allassimavoq, nungusaataanngitsumik aalisarneq ingerlanneqassasoq aamma allassimalluni biologit aalisartullu ilisimasaat naapertorlugit pisassiisoqartassaoq.

Karl-Kristian Kruse isumaqatigiissummik eqquutsitsinngilaq

Tassalu tamannarpiaq pillugu Demokraatit Inuusuttaat allapput, Aalisarnermut Naalakkersuisoq Karl-Kristian Kruse naalakkersuisooqatigiit isumaqatigiissutaannik unioqqutitsisoq aamma oqarlutik kinguaassagut eqqarsaatiginagit taama amerlatigisunik pisassiisoq.

- Kinguaassatta Kalaallit Nunaat pitsaasoq ingerlateqqissappassuk taava aalisarneq nungusaataanngitsumik ingerlanneqartariaqarpoq soorlu naalakkersuisooqatigiinnermi isumaqatigiissut taama tunngavilimmik atsiorneqartoq, Demokraatit Inuusuttaasa siulittaasuat, Rasmus Dalsgaard Andersen aamma siulittaasup tullia Henrik Thomsen allapput.

Taakku siunnersuutigaat biologit innersuussutaat tusaaniarnerusariaqartut.

- Bilogit Nunatsinnit aningaasalersorneqarput, taakkulu siunnersuutaasa malinneqartannginneri sianiilliorneruvoq, siulittaasoq tullialu isornartorsiuipput.

Aamma Demokraatit eqeertariaqarput

Aalisarnermut Naalakkersuisoq kisimi isornartorsiorneqanngilaq. Aamma parteertik Demokraatit eqqummaarinnerusimannginneri isornartorsiorpaat.

- Taama amerlatigisunik saarullittassiisoqarnera pillugu Demokraatit erseqqarissumik nalunaartariaqarput sinittutut pissusilersorunnaarlutik, Demokraatit Inuusuttaasa siulittaasuat, Rasmus Dalsgaard Andersen allppoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat