Partii Naleraq: Nammineerumanerput piinnarlugu ilagut pilliutigissagutsigit akuerinngilagut
- Danmarkip ikiuunnissaanut uatseertornera uagut akuerinngilluinnaqqissaarparput. Taassumalu Inatsisartuni qaqinneqarnissaa ilungersuullugu sulissutigilerparput.
Tasiilami isumaginninnermut ajornartorsiutit oqallinnermi sakkortusigaluttuinnartut pillugit, Partii Naleqqami siulittaasoq Hans Enoksen taama oqarpoq.
Oqallinneq aallartippoq, Isumaginnermut naalakkersuisup Martha Abelsenip Danmark ikiuineruniarluni saaffiginnissutaa itigartimmagu.
Maanna Danmarkip ikiuineruniarnera akuereqqullugu Partii Naleqqap Siumut kimigiiserfiginialerpaa.
AAMMA ATUARUK Ajornartorsiutaasut qulaajarneqarluaqqaartariaqartut
Agguaqatigiissillugu meeqqat pingasuugaangata ataaseq kinguaassiutaasigut atornerlunneqartarpoq, meeqqallu marluugaangata ataaseq kommunemi isumaginninnikkut suliassaasarluni. DR-ip piviusulersaarusiaani " Byen hvor børnene forsvinder" -imi takutinneqarput, Tasiilami ajornartorsiuterpassuit.
Meeqqat ajornartorsiortut pisortanullu nalunaarutigineqartartut naammattumik suliarineqartannginnerat piviusulersaarummi isornartorsiorneqangaatsiarput.
Amerlanerussuteqartut Danmarkimit ikiorneqarnissaq kissaatigaat
Inatsisartuni amerlanerussuteqartut Danmarkimik oqaloqateqarnissaq piumasaraat, Tasiilami isumaginninnikkut suliat suleqatigiissutigineqarnissaasa allartinneqarnissaat pillugu.
Danmarkimiilli ikiorneqarnerunissamik kissaateqarneq Martha Abelsenip itigartitsinera Partii Naleqqamik sakkortuumik oqaaseqarfigineqarpoq.
AAMMA ATUARUK Avataanit ikiorneqalertigata ajornartorsiutaasut misissorneqaqqaassasut
- Akuerinngilagut ilagut upperartut orlorartut isiginnaaginnarlugit nammineerumanerput piinnarlugu ilagut pilliutigissagutsigit, Hans Enoksen oqarpoq, nangillunilu.
Tasiilami kinguaassiuutitigut innarliinerit
Tasiilami pigisaanilu kinguaassiuutitigut pinerliinerit ukiut pingasut kingulliit ingerlaneranni 193-it nalunaarutigineqarput.
Meeqqanut kinguaassiuutitigut atornerluinerit 20-t siorna nalunaarutigineqarput.
Tasiilami pigisaanilu meeqqanut kinguaassiuutitigut pinerluttuliornerit 15-it maanna suliarineqarput.
Meeqqat illersuisuata aamma nalunaarutigaa nalunaarutigineqarsimanngitsut amerlasoorujussuusut.Agguaatigiissillugu meeqqat pingasuugaangata ataaseq kinguaassiutitigut atornerlugaasarpoq, meeqqallu marluugaangata ataaseq kommunemi isumaginninnikkut suliassaasarpoq.
- Taamaammat sukkanerpaamik ikiorseerusuttut tikilluaqqullugit ikiortiginissaat uagut aqqutissiukkusupparput.
Abelsen Tasiilamukassaaq
Partii Naleqqap saniatigut aamma Inuit Ataqatigiit, Atassut, Suleqatigiissitsisut Demokraatillu maanna Danmarkimik suleqateqarnissamik piareersimallutik nalunaareerput.
Tasiilami ajornartorsiutit qanoq annertutiginersut Martha Abelsenip paaseqqaarusuppai,
Danmarkimiillu ikiorneruneqarnissaq aamma qanoq annertutigisumik ikiorneqarnissamik pisariaqartitsisoqarnersoq paaseqqaarlugit isumaginninnermut naalakkersuisoq aalajangerniarpoq. Martha Abelsen Tasiilamut tikeraassaaq maajip ulluisa 29-anni.
Taanna naapertorlugu qallunaat sulianik sullissisartut kalaallit nunaanni pissutsinik ilisimasaqaratik isumaginninnermi suliassaqarfimmi unammilligassat ilaannik aaqqiisinnaanerat misilittagaqarfigineqarpoq, kisianni nuna qimakkaangassuk, ajornartorsiutit piffissaq sivisunerusoq eqqarsaatigalugu aaqqiivigineqarneq ajorput.
AAMMA ATUARUK Naalakkersuisut ikiorneqarumanngillat - danskit politikerii ikiuerusupput
Isumaginninnikkut pissutsit ajunnginnerulernissaannik Folketinget arlaleriarluni Naalakkersuisunut ikiuunniarluni neqerooruteqartaraluarpoq - saaffiginnissutigineqartulli itigartitsissutigineqarput.
Ikiuunnissamut neqerooruteqarneq suli atuuttoq, Folketingemi partiit Venstre, De Radikale aamma Socialdemokraatit KNR-mut taama oqarput.
