Politikki Inuussutissarsiutit

Partii Naleraq Inuit Ataqatigiillu: Kvotebankimik pilersitsisoqarli

KNR TV-kkut qineqqusaartut tallimanngormat oqallitsinneqarmata raajarniarneq eqqartorneqangaatsiarpoq. Partii Nalerat IAlu kvotenbankimik pilersitsisoqarnissaanut isumaqatigiipput, taamaalilluni nunatta karsia aningaasanik isertitaqarnerusinnaasoraat.

Allattoq Sara K. Jakobsen

novembarip 17-at 2014 17:28

Nutserisoq Tikaajaat Kristensen

Innuttaasut, raajarniarnissamut soqutiginnittut, pisassiissutit ilaat attartorsinnaassavaat. Partii Naleraq Inuit Ataqatigiillu taama isumaqarput, KNR TV-imi qineqqusaartut oqallitsinneqarneranni kingullermi taakku oqarpuq kvotebankiliortoqarnissaa sulissutiginiarlugu, kinguaariit tullii pillugit.

- Kvotebankimik pilersitsineq aamma isumaqarsinnaammat nutaamik aaqqissuusseqqinnermik aammalu kilisaataateqarnermi allanilu nutaamik aningaasarsiornermik aallartitsinissamut kvotebanki periarfissiisussaavoq, Aqqaluaq B. Egede Inuit Ataqatigiinneersoq oqarpoq, Partii Naleqqap innuttaasunut raajartassiissutinik agguaasinnaanngornissamut siunnersuutaa taperserlugu.

Aamma atuaruk Biolog: Raajat ikiliartornerat isumakulunnartoqarpoq

- Uggornaraluartumik avataanit pisassat qassikattaannannguit inunnit pigineqarput. pisassat taakku utertinneqartariaqarput inuiaqatigiinnut taava tassanngaanniit agguaateqqillugit- aalisartunut nutaanut, inuusuttunut periarfissat aamma ammaanneqartariaqarput. Taamaaliunngikkutta siunissami inuusuttut ineriartornissaat aqqutissiuussinnaanngilarput, Partii Naleqqami siulittaasoq Hans Enoksen oqarpoq.

Taassuma qineqqusaarummini ilanngullugu allappaa partiip aalisarnermut aningaaserivimmik pilersitsinissaq sulissutiginiaraa, aalisarnerup nutartersinnaajuarnissaa anguniarlugu, inuussutissarsiutinut tapiissummut atuutereersumut taarsiullugu.