Ilisimatooq: Partiit qinersisartunut paasissutissat qulakkiissavaat
Partiimmi arlallit qineqqusaarutitik suli nittartakkaminnut ivertissimanngilaat, ilaasalu oqaatsit ataasiinnaat atorsimallugit.
Partiit paasissutissaataasa pissarsiariuminaannerat inuinnaat naalakkersueqataanerannut ajornartorsiutaavoq. Innuttaasut akuulersinneqarnissaannut Ilisimatusarfimmi PHD-liortoq Anna-Sofie Skjervedal taama isumaqarpoq.
Inuinnaat naalakkersueqataanerat qulakkeerniarlugu, paasissutissat paasiuminarlutillu ajornanngitsumik pissarsiarineqarsinnaanerat tunngaviupput.
Anna-Sofie Skjervedalili nassuiaavoq, taamaakkaluartoq qinersisartut eqiingasariqartut.
- Qinersisartut isummersornissaq eqqarsaatigalugu paasiniaassallutik akisussaaffeqarput, qinersisartulli qineqqusaarutiminnut ammaannissaannut partiit suli annerusumik akisussaaffeqarput.
Tamanna iliuusissanik pitsaasunik pilersaarusiornissamut partiinut piumaffiginnippoq, taamaalillunilu sapinngisamik amerlasuunut anngunnissaq qulakkeerlugu.
Paasissutissat tusagassiuutit sapinngisamik assigiinngitsut atorlugit siammarternissaat pingaaruteqarpoq, oqarsinnaavugut ingammik maani Kalaallit Nunaanni, maanimi paasissutissanik pissarsinissaq nuna tamaat isigalugu assigiinngeqimmat.
Eqqaaneqarsinnaapput radio, tv, qarasaasiatigut inuit attaveqarfigisartagaat, qarasaasiaqanngitsullu eqqarsaatigalugit qangatut pappialanut naqitat. Immikkulli ilisimasalik isumaqarpoq suli sammisassaqartoq.
- Oqaatsit ataasiinnaat atorlugit paasissutissiigaanni taava innuttaasut ilaat paasinninnissaraluannit tunulliunneqassapput politikkimilu isummersorsinnaajunnaartillugit.
